Angnud ka sorkar ban buh ki prokram bapher bapher ban kyntiew ïa ki samla ka jylla, pynpaw u Conrad

Shillong, Jymmang 20: U Myntri Rangbah ka jylla u Conrad K Sangma, ha ka sngi baar u la leit ban shim bynta ha ka SPARK Summit 2025 kaba la long ha U Soso Tham Auditorium, Shillong. Ha kane ka prokram la don lang ruh u Myntri ka tnat pule puthi u Rakkam A Sangma, MLA, Kharkutta, Rupert M Momin, Secretary, Education, Swapnil Tembe bad u Director of School Education & Literacy, Banteilang Kharshandi nalor kiwei pat.
Haba kren ha kane ka sngi u Myntri Rangbah u Conrad K Sangma, u la ong ba bun na ki nongshong shnong ki pyrkhat ba ka sorkar ka trei halor ki skhim bad ki program bad na ka liang ka sorkar ka la buh ïa ki prokram bapher bapher kum ka dak ban kyntiew hi ïa ka jylla baroh kawei. U la ong shuh shuh ba ka jingbun paid ha ka ri baroh kawei kadei ha ka rta kaba 15-19 snem bad ha Meghalaya kiba bun tam ki nongshong shnong ki dei hapdeng ka rta kaba 0-4 snem bad da 49% na ka jingbun paid ki dei ha ka rta kaba 20 snem bad bynrap, “Kane kadei shisha ka kam kaba hap ban ïakhun bad lyngba ki prokram kum ka SPARK, Early Chiledhood Development Program, MPower, MGMP, YES Meghalaya, ki prokram ïalehkai kidei baroh ki kam ba hap ban pynlut.”
U Myntri Rangbah u la pynpaw ruh ïa ka jingdonkam ban pynlut ha ki prokram jong ki samla khnang ban kyntiew ïa ka jingim jong ki. “Ka Meghalaya kadei kawei na ki katto katne ki jylla kaba shim khia bha ban kyntiew ïa ka bha ka miat jong ki khynnah bad khyllung, ki samla pule bad kiba la heh la san bad ki jingpynlut ha kine ki prokram kin sa long ki jingmih kiba bha ha ki snem ban wan,” u la bynrap. Haba phai sha ka kynhun jong ki rta kiba hapdeng 9-19 snem kaba dei ka rta jong kiba dang samla, u la ong kane ka rta ka dei kaba hap mad bun ki jingeh bad kaba donkam bha ka jingïalam lynti bad ka prokram kum ka SPARK ka long ban kyrshan, ban ïalam lynti bad ban syllok khnang ba ki samla kin long ki nongshong shnong kiba don ka jingkitkhlieh.
“Lada phi kwah ba ka Meghalaya kan long kawei na ki jylla ba bha ha ka ri ngi donkam ban trei bad ban pynlut ha baroh ki kyrdan watba hap mad hapdeng ki jingeh hynrei ngi shim pat ka rai ban pynïaid shakhmat ïa ka jylla bad nga sngew skhem ba da ki prokram, ki rukom treikam bad ki thong yn lah ban kynjoh sha ka thong.”
Ha kane ka sngi u Myntri Rangbah bad kiwei ki heh ki haiñ ki la sam ïa ki tablet bad ki syrnot sha kiba la pass bha kiba la shim bynta ha ka prokram ka SPARK. Ka SPARK kadei kawei na ki prokram ki skul kaba don ka jingthmu ban kyntiew ïa ki samla ha kiba bun ki liang. Kum shi bynta na ka National Education Policy (NEP) bad kaba la ïoh ka jingithuh halor ki jingjop ba la pyntreikam ïa ki prokram jong ka Education Ministry. Ïa kane ka prokram la pyntrei da ka AVENUES, kaba dei kawei na kiba ai jinghikai ba la kyrshan da ka Samagra Shiksha kaba dang hab hapoh ka tnat pule puthi.