Shillong, Jymmang 19: Ka Jaiñtia National Council (JNC) Khliehriat Circle ha ka sngi Nyngkong ka la dawa ïa ka Purbanchal Buildtech Pvt Ltd ba kan shimkhia ha kaba ïadei bad ka jingdonkam ban pynduna ïa ka jingpynmih pum pum ha ka por pyntrei ïa ka surokbah National Highway-6 ha Khliehriat ka East Jaiñtia Hills.
Ha ka kyrwoh khubor na ka liang ka JNC ka la kdew ba ka jingpum pum ka la ktah haduh katta katta ïa ki nongleit nongwan, kynthup ïa ki samla pule bad ki nongshong shnong jong ka thaiñ.
Shuh shuh na ka liang ka JNC ka la pyntip ba ka la thoh ruh sha u Deputy Commissioner, ban ai jingbthah kaba donkam sha ka Company ba kan pynthikna ha ka ban theh um man ka por ïa ka surok ha ka por ba shna ïa ka surok ban weng ïa ka jingpum pum.
Na ka liang ka JNC ka la ong ba wat hapdeng ka hukum ba la pynmih da u DC, ka Company kam shym la lah ban shim ïa ki lad jingïada na ka jingpum pum.
“Namar kata ngi la ïakynduh ïa u Engineer bad dawa ban shim ïa ki sienjam ban ïada na ka jingpynmih pum pum. Ngi la pynpaw ïa ka jingktah kaba sniew jong ka pump um ïa ka koit ka khiah jong ki paidbah bad ka jingim ba man la ka sngi, da kaba kyntu ba ïa ki jingkyrpad jong ngi dei ban pynbeit khlem da pynslem shuh,” bynrap ka kyrwoh na ka seng JNC.
Ka JNC ka la pyntip ba u Engineer jong ka kompeni u la pynthikna ban shim ïa ki sienjam ban pynkhuid ïa ka surok arsien shisngi.
Ha kajuh ka por, ka JNC ka la maham ban shim ïa ka rai kaba tyngeh lada ka kompeni kam lah ban weng ïa katei ka jingeh.
