Khliehriat, Jymmang 19: Ka Jaiñtia Women Council (JWC), lyngba u kyrwoh ba la phah da ka President ka kong Ebansara Lamare, ka seng ka la kynnoh ba ïa u samla (L) Sñiawbhalang Suchiang la pyniap da uba ñiah ïa ka trok jong ka company Star Cement bad ka seng ka dawa ba dei ban kem mardor ïa tei uba ñiah ïa ka trok jong ka Star Cement.
Ka JWC ka la kynnoh bad kynthoh da kaba ong ba “Ka jingleh heh ka Star Cement bad ki nongñiah trok jong ka company ka long haduh ba khlem kheiñ shuh ïa ka jingim briew, katkum ka jingtip jong ka seng, utei uba ñiah ïa ka trok jong ka company ba don u registration number ML-11-A 3162 ba ñiah da u Sailangmi Dkhar, naduh lad JUD (Wahiajer) u la sdang ban leh khlemakor da kaba break shisyndom ïa ka trok bad ha kata ka por u (L) Sniawlang Suchiang uba ñiah ïa ka kali bolero comper u la pyrshang ban ïakren bad utei uba ñiah trok hynrei um sngap satia bad ynda poi ha Star cement, ha Gate-I u la pyrshang biang ban ïakren sngewthuh bad utei uba ñiah trok um treh satia ban ïakren bad ha kata ka por uba ñiah ïa ka trok u la pynher stet syndon ïa ka kali bad tynrah ïa u Sniawbhalang Suchiang haduh ban da khlad ha shen.”
Ka seng ka la kynnoh ruh ba “kane ka jingleh utei uba ñiah trok ka dei ka jingleh ‘riew thrang snam bad ka dei ka jingpyniap briew bad jingai mon ka Star Cement ïa ki nongñiah trok jong ka bad pynshlur ïa kiba ñiah kali da kaba ai bai trip system na kata ka daw ki driver kim kheiñ shuh ïa ki briew ba ïaid, ka seng ka dawa ban kem ïa utei ba ñiah trok bad pynshitom katkum ka aiñ khnang ban nym jia shuh ka jingjia ba sngewsih” pynkut u kyrwoh.
