SHILLONG, Jymmang 17: Ha ka sienjam kaba kongsan na ka bynta ban pynroi ïa ki nongïalehkai martial arts ha India, ka tnad ïalehkai jong ka sorkar India ka la ithuh paidbah ïa ka India Taekwondo kum ka National Sports Federation (NSF) kaba don ka jingkitkhlieh ban synshar bad khmih ïa ka jingïalehkai Taekwondo ha kylleng ka ri.
Kane ka sienjam ka long halor ka jingbthah jong ka World Taekwondo, ka synjuk kaba ïasoh bad ka International Olympic Committee (IOC), bad pynskhem ba ka India Taekwondo ka dei tang ma ka ka seng ha India kaba ïasoh bad baroh ar ka World Taekwondo bad ka Asian Taekwondo Union.
Da kane ka jingithuh, ki nongïalehkai ka ri India mynta kin ïoh ïa ka lynti kaba ryntih bad kaba la pdiang da ka pyrthei ban ïashim bynta ha ki jingïakop ha ka thaiñ, ka ri, bad ha ka pyrthei, kynthup ïa ka Asian Games, Olympic Games, bad Paralympics.
Ha ka kyrwoh ba la pynlait paidbah, u Namdev Shirgaonkar, President ka India Taekwondo, u la pdiang burom ïa kane ka jingithuh kaba la ap slem bha, da kaba ong ba ka dei ka “por ba kongsan” na ka bynta kane ka jingïalehkai ha India. U la pynpaw ka jingsngewnguh kaba khraw ïa ka tnad ïalehkai bad ai khublei ruh ïa ki synjuk ïalehkai jylla ba ïasoh lang na ka bynta ka jingkyrshan ba khlem sangeh bad ka jingshimkhia jong ki ban kyntiew ïa ka Taekwondo.
“Kane ka jingithuh ka plie lad ïa ka jingïashim bynta kaba suk bad kaba khlem jingeh jong ki nongïalehkai Taekwondo na India ha ki jingïalehkai ba pawnam ha ka pyrthei kum ki jingïalehkai Asian Games bad Olympics. Ka long ka jingkyrshan kaba khraw ïa ki nongïalehkai jong ngi,” la ong u Shirgaonkar.
Kane ka jingithuh ka plie lad ruh ïa ki nongïalehkai Taekwondo kiba la ïoh takma ban ïoh ïa ki khusnam na ka ri kum ka Arjuna Award, Khel Ratna, bad kiwei kiwei ki khusnam ba pawnam. Shuh shuh, ki nongïalehkai mynta ki lah ban ïoh jingmyntoi na ki jingïarap ba la kyrshan da ka sorkar, ki lad kamai, bad ka jingkyrshan ha ka jinghikai.
Naduh u snem 2019, ka India Taekwondo ka la shakri kum ka kynhun ba marwei ba la ithuh kum ka Member National Association (MNA) jong ka World Taekwondo bad ka Asian Taekwondo Union. Ka synjuk ka la pynsuk beit ïa ki nongïalehkai India ban ïashim bynta ha ki rynsan ïakop ha ka pyrthei, kaba la noh synñiang shibun sha ka jingkiew jong ka jingïalehkai ha ka ri.
