Khyrwit sa u Myntri ïa ka NTA ba ngat thoh eksam CUET ki samla pule sha ki jylla ba jngai

Shillong, Jymmang 12 : Ka sorkar jylla ka la kyntu ïa ka National Testing Agency (NTA), ba kan pynjlan noh mardor ïa ka Common University Entrance Test na bynta ki samla pule ka jylla kiba la hap ban leit thoh eksam shaduh kiwei ki jylla jong ka Ri.
Haba pyntip ïa kane ha ka sngi Nyngkong, u Myntri ka tnat Pule Puthi u Rakkam A Sangma u la ong, “Ngi la thoh da ka shithi kaba tyngeh sha ka NTA mynta ka sngi ban pynjlan ïa baroh ki eksamin na ka bynta ki samla pule kiba la ngat ban leit thoh eksam ha ki jaka kiba jngai na ka jylla.”
Shuh shuh u la ong ba ki la dep ruh ban bthah ïa ka tnad pule puthi ban ïa kren bad ki samla pule kiba shah ktah.
Na ka liang u Myntri u la ïathuh ruh ba na ka NTA ka la pyntip sha ka sorkar jylla ban don shuh shuh kham bun ki centre khnang ban ïoh buh sa 200 tylli ki computer na ka bynta ban lah pynïaid beit ïaid ryntih ïa ka eksam CUET. U ong ruh ba halor kane na ka NTA kan sa pynlong ïa ka jingjurip ïa kine ki jaka ba la jied.
“Ngi la jied ïa ki jaka bad ngi la pyntip sha ka NTA bad kumta kin sa wan lashai ban jurip la ki jingpynkhreh ki la biang neem katkum ki kyndon ba la kwah,” u la ong.
U Myntri u la kdew ruh ba ka sorkar jylla ka la banjur halor ka jingdonkam jong ka NTA ban thung ïa u nodal officer ba pura ha ka jylla.
“Ka NTA ka la dei ban pyntip sha ka sorkar jylla ha ka por khnang ba ngin lah ban shim ïa ki lad ki lynti khnang ba ki samla pule kin ym ïakynduh jingeh,” u la ong da kaba bynrap, “Hynrei hadien ba la pyntip shaphang kane ka mat, u Myntri Rangbah u la ïakynduh ruh ïa u Myntri Pule Puthi ka Sorkar Pdeng bad mynta ngi la don ha ka kam ban pynbeit ïa kane.”
Shuh shuh u Myntri u la ong ba ka jingeh ka dang mih haduh mynta ha ka jylla Meghalaya namar ka jingbym lah jong ka NTA ban ïa kren bad ka sorkar jylla.
“Ka NTA ki pyntip tang shisngi ne ar sngi shwa ban long ka eksam. Ka eksam kan sdang naduh lashai (Sngi Baar) bad katto katne na ki samla pule ki la dep leit sha ki jaka bapher bapher. Kumta ngim lah ban leh ei ei halor kata. Hynrei hadien ba u Myntri Rangbah u la shim ïa kane ka mat bad u Myntri jong ka Sorkar Pdeng ha Delhi hynnin ka sngi, ka NTA ka la pyntip sha ka sorkar jylla ban jied kham bun shuh shuh ki centre bad mynta ngi dang don ha ka kam.”
Halor ka jingkylli, u Myntri u la ong, “Nga thikna ba kito ki samla pule kiba don eksam hadien kane ka taiew, thikna ba ïa ki eksam kin sa pynjlan bad yn pynkynriah noh kumba la pynthikna da ka NTA. Na ka bynta lashai ka sngi, ki don ki samla pule kiba la dep leit sha ki centre kiba don hajan.”
U ong ruh ba na ka bynta kito kiba ngat sha ki jaka ba jngai kum ka Jharkhand, ïa kita yn pynlong ha ka 19 tarik u Jymmang bad na ka bynta kata u ong ba ki kyrmen ba yn lah ban pynbeit. “Nga mut ban ong ba ngi khmih lynti ïa ki samla pule kiba ngat ha ki centre ha ki jaka ba jngai ba yn lah ban pynbeit.”
Shuh shuh haba batai halor ka daw ba ym lah ban weng ïa kane ka jingeh, u Myntri u la ong, “Kane ka dei namar ba kam dei ka rai jong ka sorkar jylla. Kumta, ngi la seng ïa ka State University ha kaba ki college kiba pynïasoh (affiliated) bad ka state university kim donkam ban thoh ïa ka eksamin CUET ban ïoh rung klas.