Jowai, Ïaïong 30 : Ka War Jaiñtia Students’ Union (WJSU) hadien ka jingpynlong ïa ka jingïalang kaba kyrkieh bala pynïaid da u Vice President ka seng u ma Heart casing Dkhar ha kane ka sngi siatjaiñ 26 tarik ha Amlarem, ki la shim rai ïa KA rai, kaba long pyrshah ïa ka jingthmu tih marpoh khyndew (Major Mining) hapoh ka thaiñ War Jaiñtia, namar kane ka lah ban ktah ïa ka mei mariang bad ïa ki nongshong shnong.
Hadien ka jingïatai ha katei ka jingïalang da kawei ka jingmut ki la rai ban maham jur ïa kino kino kiba thmu ban tih marpoh kyndew da kiba heh nalor ba la don lypa ki Minor Mining hapoh jong kane ka thaiñ.
Ki ki nongïalam ka seng ki la pynsngew wat ïa ka jingtip marpoh khyndew ïa kiba la ioh licence da ka sorkar ki la wanrah ïa ka jingktah ha ka mariang, hynrei ka la long pat kum ka lad ban pynïoh kam ïa ki briew jong katei ka thaiñ.
Halor kane ka seng ka la ïoh jingtip ki don kiba thmu ban wanrah ïa ka jingtih marpoh khyndew da kiba heh kiba la ïoh Licence na ka sorkar hapor War Jaiñtia, hynrei na ka liang ka War Jaiñtia Students’ Union ka la buh da ka jingmaham kaba tyngeh ïa kino kino kiba thmu wanrah tih marpoh khyndew hapoh ka thaiñ War Jaiñtia.
Ka seng ka ïeng ha ka nongrim kaba skhem kata ban ïada ïa ka mei mariang na ka jingshah pynjulor bad kan ïaleh ban wanrah ïa ka bah ka miat na ka bynta ka lashai jong ka thaiñ War Jaiñtia hi baroh kawei, la pynkut ka kyrwoh na u Gabriel Shylla uba dei u Publicity Secretary ka WJSU Central Body, Amlarem.
