Jowai, Ïaïong, 22: Ka Khasi Jaiñtia Youth & Students Union (KJYSU) haka jingïalam jong u President Rangbah u Bah Chemi Phawa bad u General Secretary u Bah Dawni Shullet mynta ka sngi 22 tarik Ïaïong, 2025 ki la leit ai daka dorkhas bad ïakren bad u Chief Engineer (Distributor) jong ka Meghalaya Electricity Corporation Limited ha office treikam jong u kaba don ha Lumjingshai, Shillong , East Khasi Hills District
Ha kane ka jingthoh ka seng ka la kyrpad bad kyntu ïa une u officer jong kane ka tnad ba dei ban bujli mardor ïa u wei u rishot teh sainar bording ne post light uba don haka shnong Mawlyngnga ba hap hapoh ka Mawryngkneng Sub-Division.
Kat kum ka jinglap jong ka seng te une u post light u dei uba da u dieng bad uba la rim bha, u don hajan surok bah hajan ïingbriew bad uba la jan dkut. Kumta u lah ban khyllem ha kano kano kapor ba ym shym lah ban poi pyrkhat bad ka lah ban wanrah ïa ka jingmynsaw bad ka jingjia ba sngewsih ïa ki paitbah kiba don hajan bad kiba ïaid lynti.
Ha kane ka jingïa kynduh seng ka la kyrpad ïa kane ka tnad ba dei ban peit ba kan shim khia ban bujli thymmai mardor da u wei pat u ba kham bha bad kham skem.
Haka jingïakren bad une u heh officer, ula kular ïa ki nongïalam ka seng ban ai jingthoh sha u Executive Engineer ba dei peit ïa kane ka kam bad ban shim khia ban bujli kloi kloi katba lah.
Hadien jong kane ka dorkhas bad ka jingïakren, ka seng ka kyrmen bad khmih lynti ba kane ka department kan shim khia ban leh mardor ïa kane ka kam na ka bynta ka jingbit jingbiang jong ki paitbah khamtam kiba shong basah hakane ka thaiñ. Ïa kane ka khubor la phah da u C. Phawa President Rangbah bad u D. Shulet General Secretary ka seng.
