Shillong, Ïaiong 21 : Ka National Secretary ba thymmai jong ka National People Party (NPP), ka Dr. M Ampareen Lyngdoh ha ka sngi Nyngkong ka la pyntip ba ka jingïalang ba nyngkong jongka National Executive Committee jongka party kan long ha Shillong ha ka 24tarik mynta u bnai.
Haba kren bad ki lad pathai khubor, ka Myntri ka la ong, “Ngin sa don ai ka National Executive Committee ba nyngkong eh jong ka party ha Shillong ha ka 24tarik mynta u bnai. Nga ngeit ruh ba ki paidbah ka Meghalaya kin ioh ïa ka kabu ban iohsngew na u National President halor ki kam bad ki jingthmu kiba ka party ka don ban leh ha kine ki samoi treikam kiba lai snem jong kane ka kynhun treikam ba mynta.”
Ha kajuh ka por ka pynpaw ruh ka jingsngewkmen bad sngewnguh ïa u National President Conrad K Sangma bad ruh u Working President James K Sangma halor ka jingibit ban kynthup lang ïa ka ha ka kynhun kum ka National Secretary.
Da kaba pynpaw ïa ka jingsngewsarong ba ka National Party ka mih na kane ka jylla kaba rit jong ka Meghalaya, ka Dr. Ampareen kaba dei ruh ka Myntri jong ka sorkar jylla kala ong ba ha ki khyndiat snem ki la iohi ïa bun ki jingeh kiba ka thain shatei lam-mihngi jong ka ri ki kynduh hynrei dei ynda baroh ki jylla ki wan ha kajuh ka shatri bad pyntylli ïa ka sur ba ka sorkar India ruh ka sngap ïa ka sur jong ki.
“Kane kadei ka thong treikam jong ka NPP ha ka Ri,” ka la bynrap biang.
