Ka jingthmu ban wanrah lynti rel kam dei ban plie lad ïa ki mynder ban rung sha ka jylla: Prestone

Shillong, Ïaiong 20 : U Symbud Myntri Rangbah ka Jylla, Bah Prestone Tynsong ha ka sngi Saitjain u la ong ba ka jingthmu ban wanrah lynti rel ha rilum Khasi – Jaintia kam dei satia na ka bynta ban plie lad ïa ki briew kiba nabar ban wanrung kyrthlep sha kane ka jylla.
“Mano bym kwah ïa ka lynti rel. Ngi donkam ïa ka lynti rel. Hynrei ka jingwan ka lynti rel kam mut pat ba yn plie ïa ka jingkhang na ka bynta ki briew kiba nabar ba kin wan rung bad sah ha kane ka jylla. Lada ka long kumta nga ruh ngan pyrshah ïa ka jingpyntreikam ïa kum kine ki projek,” ong u Bah Prestone haba kren bad ki lad pathai khubor.
Ha kajuh ka por pat u la kulare ba ka sorkar kan sa ïa syllok lang bad baroh kiba don bynta ha kane ka kam halor kane ka ishu lynti rel ha rilum Khasi-Jaintia.
“Ngi donkam ban ïa syllok bad ïatai sani bha ha shwa ban shim ïa ka rai,” ong u Bah Prestone.
Dang shen ka sorkar ka la thaw ïa ka All Party Committee ban bishar bniah halor ka jingtyrwa na ka bynta ban wanrah ïa ka lynti rel ha rilum Khasi-Jaintia ha ka jylla.