Shillong, Ïaïong 19: Kawei ka seng kaba khot kyrteng ïalade da ka A·chik Dedicated Integrity Leaders (ADIL) ha ka kyrwoh khubor ba la phah ka la pynrem jur ïa ka jingduna ka jaka sumar Bansamgre Primary Health Centre (BPHC).
Katkum ka kyrwoh khubor, la kynnoh ba kane ka PHC ha ka jinglong jingman jong ka, ka long ka bym koit bym khiah bad ka don ruh ka jingduna ka umbam umdih ha kaba kine baroh ki dei ki kam ki bym lah satia ban pdiang ba ka jaka sumar kan duna ïa kine ki lad kiba kongsan.
Katei ka seng ka la kynnoh ruh ba ka jingpynpoi ïa ka um ha kane ka jaka sumar kam long manla ka sngi bad dei na kane ka daw ba la phah noh ïa ki nongpang sha kiwei pat ki PHC ne Williamnagar Civil Hospital, ha kaba kane ka la ktah ïa ki paidbah la kadei ka jinglut jingsep bad ka por.
