Shillong, Ïaïong, 18: Watla ka Meghalaya ka don lehse da ki spah spah tylli ki pung ri dohkha hynrei kum ka jylla ka dang hap ban shaniah pat ha ki jylla na shabar ban pyndap ïa ka jingdonkam dohkha ha kane ka jylla kaba kot palat da ki phew trok tang ha ka shi taiew.
Ha u snem 2012-2013, ka Sorkar Jylla ka la sdang ban pyntreikam da ka Aquaculture Mission bad kiwei ki skhim sorkar pdeng naka bynta ban sdang noh ïa ka jingpynmih dohkha na la ka jong ka jylla.
Tangba, haduh mynta pat, katkum ki jingtip ba la ïoh lum na ka 32,000 ton ba ka Meghalaya ka donkam dohkha tang kumba 20,000 ton ba ka Jylla ka lah ban pynmih nalade.
Kumta, halor kane haba ïakren bad u Myntri ka tnad Animal Husbandry & Veterinary, Bah AL Hek u la ïathuh ba haduh mynta ka jylla kam pat don ki pung ri dohkha kiba heh bad bun ruh ki dei ki pung jong ki riew shimet kiba bunsien la pynlong kum ki jingïakob khwai dohkha.
“Na ka sorkar ka ju kyrshan ïa ki paidbah kiba kwah ban shna pung dohkha bad ai ruh ki symbai dohkha ba kin sdang ïa kane ka kam namar ngi thrang bad buh thong ba ha kawei ka sngi ka jylla kan sa lah ban pynmih dohkha noh na la ka jong ka jylla,” ong u Myntri.
Da kaba pynpaw ba kum ka tnad kam don ei ei ban pyrshah ïa ka jingpynlong ïakob khwai dohkha lada ki la dep ban ïoh jingbit na ki bor distrik bad kiwei ki bor ba dei peit hynrei u la ong pat, “Ngi ïohi ba bun ki la kham pynleit jingmut ha ki jingïakob khwai dohkha bad kim shimkhia shuh ban leit die sha ki iew ki hat.”
U Myntri u la kubur ruh ba ki paidbah ka jylla ki kham ïa beh ïa ki dohkha ba pynmih na ka jylla lada ki paidbah ki wan ban die watla ki dang kham duna. “Nga tip ba ki don tang katto katne ki jaka kiba ju die ïa kine ki dohkha ba ri hi ha kane ka jylla ,” u la bynrap biang.
Na ka liang u Myntri u la kyntu ruh ïa ki paidbah ba ki dei ban shim kabu ïa ki skim sorkar kiba ïadei ban ri dohkha khnang ba ha kawei ka sngi yn sa lah ban pyndap shisha tang nalade ïa ka jingdonkam dohkha ha ka jylla khlem da donkam shuh ban wanrah na kiwei pat ki jylla jong ka ri India.
