Shillong, ïaïong, 17: Ryngkat lang bad ka Balang Catholic ha ka pyrthei baroh kawei, ki riewngeit jong ka Jylla Niambah Shillong ki la kynmaw burom ïa ka Sngi Thohdieng Bakhuid ka sngi kaba u Trai Jisu u la shah shitom bad shah ïap halor ka Diengphna ban siewspah ïa ki pop jong u khun bynriew ha sla pyrthei.
Ha baroh ki ïingmane jong ki Parish bapher bapher la sdang ïa ka jinglehniam da ki mat puson ïa ka Lynti Diengphna bad la pynbud pat sa ka jingleh burom ïa ka Diengphna da ki paidriewngeit.
Shwa kane, ki paidriewngeit ki la ïashim bynta ha ki 14 tylli ki jaka ban puson naduh ka khyllipmat ba la pynrem ïa u Trai Jisu ban ïap, ka jingpynbah ha U Jisu ïa ka Diengphna, ka jingkyllon U Jisu ha kaba shisien, U Jisu u ïashem bad la ka kmie ba sngewsih, u Simon u ïarap ïa U Jisu ban bah ïa ka Diengphna, ka Beronika ka ai rumar ha U Jisu, U Jisu u kyllon ha kaba arsien, U Jisu U kren ha ki kynthei Jerusalem, U Jisu u kyllon ha kaba laisien, la loit jubor ïa ki jaiñ U Jisu, la sah narphna ïa U Jisu, U Jisu U ïap halor ka Diengphna, la pynhiar ïa ka met U Jisu na ka Diengphna bad la tep ïa U Jisu.
Wat hapdeng ka jingpynthut jong slap uba la ther katto katne por hynrei ki paidriewngeit ki la ïashim bynta pura khlem sangeh ban pyndep ïa kane ka jinglehniam haduh kaba kut.
La pynkut ïa kane ka jinglehniam da ka jingïabam ïasip ïa ka Komunion Bakhuid bad la jingpynbud pat sa ka jingduwai ïa ka Jingisynei Jingblei kaba long ka jingduwai Nobena kaba khyndai sngi lynter kum ka jingpynkhreh ïa ka sngi burom jong ka Jingisynei Jingblei ka ban sa long shi taiew hadien ka jingrakhe ïa ka sngi u Trai Paskha ne ka Easter kaba dei ka sngi mihpat jong u Trai Jisu na ka jingïap.
