Ka Sorkar ka dang wad ïa ka jaka ban tei ïa ka Central Jail: Dy. CM
Shillong, April 18: U Symbud Myntri Rangbah ka jylla uba khmih ïa ka Tnad Home (Prisons) u Bah Sniawbhalang Dhar, ula pyntip ba ka sorkar jylla ka dang pynkhreh ban ithuh noh ïa ka jaka na ka bynta ban tei ïa ka Central Jail jong ka jylla.
“Ngi dang pynkhreh ban ithuh noh ïa ka jaka ban tei ïa ka Central Jail. Shisien ba ngi lah dep ban ithuh pura ïa ka jaka yn sa tei ïa ka Jail ne phatok kaba thymmai, ngin sa pynkynriah noh ïa ka Shillong District Jail kaba mynta kaba don ha ka nongbah Shillong,” pyntip u Symbud Myntri Rangbah.
Lah ban pynkynmaw ba kham ha shwa ka la don ka jingtyrwa ban tei ïa ka Central Jail ha New Shillong Township. La ïa soi ruh ïa ka jingïateh kular hapdeng ka Tnad Home (Jail) bad ka Tnad Urban Affairs ban pynkynriah noh ïa ka Shillong District Jail sha ka jaka kaba don ha New Shillong Township.
Halor kane u Bah Sniawbhalang ula ong ba ym pat lah ban ong eiei, la yn tei ïa ka Jail ha New Shillong Township ne ha kiwei pat ki jaka namar haduh mynta, ki kam ki dang ïaid shakhmat na ka bynta ban ithuh ïa ka jaka.
Ka la don ka jingïalang hapdeng ka urban affairs department bad ka home department la kumba 3 sien. La mynjur ba ka urban affairs department kan shim noh ïa ka jingdon jingem ka jaka ba don ka Shillong district jail kaba mynta kum ka jingïakylliang ïa ka jaka sha new Shillong Township.
U Dhar u la ong ba ka Shillong jail ba thymmai kan don ïa ka juh ka kyrdan kum ka Central Jail, ha kaba kan don ka jingphiah ïa ki koidi bad kiba dang shah tian bishar. Don kam ka jingheh ka jaka kaba long 25 acre ban tei ïa ka patok kaba thymmai.
U Bah Dhar u la pyntip ruh ba u la kyrpad ban pyndep noh kloi ïa ka jail ha Nongstoiñ khnang ban pynkylluid ïa ka Shillong district jail kaba khapngiah.
Kumba ka long mynta ka jylla ka don 5 tylli ki district jail – ka Shillong, Williamnagar, Jowai, Tura bad Nongpoh bad ka jingdon ki koidi ka long 595 ngut ki shynrang bad 55 ngut ki kynthei.
Ka kaiphod CAG ka la ong ba ka jingslem ban tei ïa ki jail ba thymmai ka la pynlong ïa ki koidi ban im ha ka rukom kaba isynei jong ka longbriew manbriew khlem da don ka um kaba bha bad kumjuh ruh ki paiñkhana.
Bun na ki koidi ki la hap ban thiah ha madan nalor ki jingthiah kiba la dap lypa.