Shillong, Ïaiong 15 : Ka Meghalaya State Skill Development Society (MSSDS) ka la pynkhreh mynta ban pyntbit shuh shuh ïa ki nos khnang ba kin lah ban ïoh kam ha Germany.
Haba pyntip ïa kane ha ka sngi Balang, ka Myntri ka Koit ka Khiah, Dr. M Ampareen Lyngdoh ka la ong, “Ka MSSDS ka la ïa kren bad bun ki nongai kam, ki jaka ai jingsumar na Germany bad ki la pynpaw ïa ka jingthrang ba ka sorkar India kan pyntbit ïa ki nos khnang ba kin lah pat ban leit trei ha Germany ban trei kum ki nos lane kum ki nongsumar kyrpang.”
Ka la pyntip ruh ba ka MSSDS ka la pynkhreh ïa u QR code na ka bynta ki nongshong shnong, khamtam ki GNM Nurse, ba kin scan ïa une u QR Code lada ki kwah ban pynrung kyrteng ïalade.
“Tang shu scan ïa une u QR Code ka kyrteng jong phi ka rung bad la rejistar bad phah pat sha ki nongai kam kiban sa pyntip pat ïa ki bad kan sa don pat ka jingjied ïa kaba yn sa khot sha ka MSSDS Centre kaba don ha Umsawli ïa kaba shen yn sa plie noh.
Ka ong ruh ba kumba leh ïa ki nos, hadien ba la dep ban jied ïa ki kyrtong kan sa don pat ka jingai jingkyrshan na ka Skill Development Programme jong ka sorkar jylla bad kan don ruh ka jingsiew na ka bynta katto katne lyngba katei ka song pisa.
Ka Myntri ka pyntip ruh ba ki don bun ki MSSDS Centre ha ki distrik kiba la sdang ban treikam.
Halor ka jingkylli, ka Myntri ka la ong ba mynta dei ban peit hangno don kiba dawa bad kumta kum ka sorkar ki shim ïa ka rai haba don kano kano ka jingdawa kum kine ki lad ai kam bad pyntip pat sha ki paidbah ba lada ki kwah ban leit ki lah ban shu scan ïa utei u QR Code ban rejistar ïalade.
Ka ong ruh ba hadie kane, ki bor pynïaid kin sa pyntip biang na ka bynta ki kam kiba dang sah.
“Ngi la ïohi ba ka don ka jingshongshit na ki samla pule nos na ka jylla kiba leit sha kiwei pat ki ri kum ha Singapore. Mynta ki paidbah ki sdang ban mih, don kiba trei ha Japan bad bun ki kynhun ki la leit. Kane kan ïai bteng ha ki snem ban wan namar kane ka long ka sienjam kaba paka kaba plie lad ïa ki samla ba la don jingtbit ba kin leit trei shabar ym ban shu shong ha ka jylla khlem leh ei ei,” ka la ong.
