Mawkyrwat, Ïaïong, 15: Ka HYC bad ka HITO, Mawthawpdah Area Unit ha ka sngi Baar ki la leit ban ïa kynduh ïa u SDO jong ka MePDCL Mawkyrwat Division ban pynkynmaw ha u ban ker jingïada noh ïa ki jaka buh ïa ki Transformer ha kylleng ki jaka jong ki shnong.
Lah ban kdew ba ka jingleit ïa kynduh jong ki ar seng ïa u SDO ka dei halor ka jingbym shimkhia ïa ka jingdawa jong ki ar seng ban buh jingker ïa ki transformer watla na ka liang jong ki ki la dep ban ai ka jingpyntip ba ka la don ka jingjia ïap briew naduh ki snem 2017.
Haba kren sha ki lad pathai khubor na ka liang ka HYC bad ka HITO ki la buh ruh ïa ka por ba ka ophis MePDCL Mawkyrwat Division ka dei ban pyndep noh hapoh ki lai bnai ban ai jingker ïa ki jingda ïa baroh ki transformer, khnang ba kan long ka jingïada bad lait na ki jingma ïa ki mynsiem briew bad ki mrad kumjuh.
Ka HYC Mawthawpdah Area Unit, lyngba u bah Wellman Kharlyngiong uba dei General Secretary ula pynkynmaw ba ha ka 1 tarik jong u Kyllalyngkot, 2025 ka seng ka la leit ban ker ïa kawei ka jaka buh ïa u transformer uba don ha shnong Photjalei, South West Khasi Hills District.
