Shillong, Ïaiong 15 : Ka sorkar jyllahaduh mynta kam pat lah satia ban jied ïa ki nongshimti kiba biang (qualified bidder) kiban pynïaid ïa ka 108 emergency services ha ka jylla na ka daw ka jingmih ki daw kawei hadien kawei pat.
Haba kren bad ki lad pathai khubor, ka Myntri ka Koit ka Khiah, Dr. M Ampareen Lyngdoh ka la ong, “Ki ju mih ki jingthut kawei hadien kawei pat ha ka por ba khot tender. Kumta, kumba long haduh mynta, ïa ka 108 emergency services la pynïaid da ka National Health Mission.”
Shuh shuh ka ong ruh ba haduh mynta kim pat lah ban lait na ka jingshah kynthoh hapdeng kiba kwah ban pynïaid ïa ka bad kane kadei ka dawbah kaba kim pat lah ban jied ban pynïaid ïa ka 108 ha ka jylla.
“Ka long kaba donkam ba ïa ka 108 service dei ban pynïaid da kito kiba la tbit ban pynïaid namar ki nongtrei 108 ki dei ki nongtrei kiba donkam ban ïoh bun ki jingmyntoi la ka long naduh ki insurance ïa ka koit ka khiah jong ki bad kiwei kiwei ki hok kiba ïadei bad ki nongtrei kum ha ka pang ka shitom bad kiwei kiwei. Kumta haba ka jingjied ïa ki nongpynïaid ym lah ba pynbeit kiban shah ktah dei ki nongtrei bad kane nga sngew kadei ka jingeh ïa mynta,” ka la ong.
Da kaba ïaroh pat ïa ka NHM ba ki la pynïaid bha ïa ka haduh mynta, ka Myntri ka ong ba ka kam kaba hakhmat ka long ruh ban pynbun shuh shuh ïa ki ambulance. “Peit ïa ki ambulance jongngi, bun kim long shuh kiba dang bha. Ki nongtrei jong ka 108, ka jaka sah, ka hok bad ki jingmyntoi jong ki ruh ki dang sahteng lut tang namar ngim pat lah ban rai kumno ngin leh.”
Shuh shuh ka Myntri haba pynshai halor ka jingshimpor ban jied ïa ki nongpynïaid ka la ong ba haba ïadei bad kine ki kam bun ïa tyngkhuh bad kiba nabar kumta ka sorkar ka hap ban phikir bad peitngor bha da kaba bishar bniah thik pa thik. Hynrei ka ong pat ba kan poi ka sngi ba kin sa lah pat ban jop.
