Wat khuslai, ka projek lynti rel kan ym wan katba ym pat mynjur lang da baroh : Deputy CM

Shillong, Ïaiong 14 : U Symbud Myntri Rangbah ka jylla ba peit ïa ka tnad Transport Bah Sniawbhalang Dhar ha ka sngi Nyngkong u la ong ba kan ym don satia kano kano ka project lynti rel ha Rilum Khasi bad Jaintia katba ym pat ïa mynjur lang da baroh.
Haba ïakren bad ki lad pathai khubor, u Symbud Myntri Rangbah u la ong ruh ba shen kin sa lum da ka jingïalang jong baroh ki seng sain pyrthei ban ïatai sani bha halor kane ka bynta.
“U Myntri Rangbah un sa khot ïa ka jingïalang jong baroh ki sengsaiñ pyrthei bad kane kan kynthup lang ïa baroh. Hangne ngin sa ïa kren bniah bad ngin sngap ruh kaei kaba ki don ban pynpaw bad ong,” ong u Symbud Myntri Rangbah.
Nangta u la ong ruh ba ki paidbah kim dei satia ban khuslai namar ka projek lynti rel kan ym wan katba ki paidbah kim pat mynjur lang. U ong ruh ba ïa kane u kular namar kum ka sorkar hi ki trei na ka bynta u paidbah.
Dei ha ka 03tarik mynta u bnai, ka sorkar jylla ka la thaw da ka All Party Committee haba ïadei bad ka ishu lynti rel ha ka jylla. Katkum ki kyndon treikam jong ka APC, ka bynta ba hakhmat ka long ban peit bad bishar bniah halor kane ka ishu kaba ïadei bad ka lynti rel.
Lah ban kdew hangne ba ki kynhun seng bapher bapher ki la mih puk ha East Jaintia Hills district dang shen ban pynpaw ka jingpyrshah kaba jur ïa ka lynti rel ha ka jylla.