Bthah ka MSPCB ïa ka kompeni M/s Om Om Coke ban sangeh ïa ka jingseng karkhana coke

Shillong, Ïaïong 14: Ka Meghalaya State Pollution Control Board (MSPCB) ka la bthah ïa ka kompeni M/s Om Om Coke ba kan pynsangeh lut ïa baroh ki jingtei ban seng ïa ka karkhana coke ha Thlukuru, East Jaiñtia Hills hadien ka jingpynduh noh ïa ka No-Objection Certificate (NoC) da u Dolloi ka Jowai Elaka.
Kane ka la mih hadien ba ka Sorkar Shnong ka Wapungskur ka la pyrshah jur ïa ka jingtyrwa ban seng ïa ka karkhana coke da kaba ong ba ka jaka ba la ai NoC da ka shnong Mookhep ha Thlukuru, ka dei kaba dang hap hapoh u pud u sam ka Wapungskur.
“Nga pyntip sha phi ba kane ka Ophis ka la ïoh pdiang ïa ka jingpyndam noh ïa ka NoC ba la ai da u Doloi, Jowai Elaka bad u Waheh Shnong ka Mukhep. Namar kata, la bthah ban pynsangeh noh ïa baroh ki jingtrei kiba ïadei bad ka jingseng ïa ka karkhana coke ha Thluburu Wah Tongtiang, East Jaiñtia Hills,” ong u Member Secretary ka MSPCB Dr Gh Chyrmang ha ka shithi ba la phah sha ka M/s Om Om Coke ha ka sngi Nyngkong.
U la ïathuh ruh ba ïa kane ka rai la pyntip ruh sha ka kynhun jong ka Dorbar Shnong Wapungskur, kaba la dawa jur ban pyndam noh ïa ka CTE lane kino kino ki kot ki sla/ licence ba la ai sha kane ka kompeni.
Kane ka kynhun ka la maham ruh ban shim ïa ka lynti jong ka aiñ lada shah ïa ka kompeni ba kan seng ïa ka karkhana coke hapoh u pud u sam ka Shnong bad kiwei ruh ki jaka kiba dang hab hapoh ka jingpeit jong ka shnong.
Lah ban pynkynmaw ba ha ka 7 tarik u Lber, ka MSPCB ka la ai jingmynjur ban buh ïa ka (CTE) to Om Om Coke kaba dei ka LAM COKE Manufacturing Unit ha ka shnong Thlakuru, Mookhep ha kaba kane ka projek kan lut kumba T. 4.50 klur.