Nongpoh, Jylliew 17: Kum shi bynta ban plie lad plie lynti na ka bynta ki khun samla ka dong Ri Bhoi kiba don sap ha ka jingïalehkai Boxing, ka Ri-Bhoi District Boxing Association ka la rai ban pynlong da ka lympung ïalehkai ba ar sngi ba la tip kum ka ‘Ri Bhoi Boxing Championship’ na ka bynta ki khun samla ka dong Ri Bhoi.
Kane ka Ri Bhoi Boxing Championship kan sdang naduh ka 24 tarik u Jylliew bad yn pynkut ha ka 25 tarik u Jylliew 2022 ha NSCA Indoor Stadium Nongpoh.
Kumba la pyntip da u President ka Ri Bhoi District Boxing Association ka seng ka shim ïa kane ka sienjam ba nyngkong ka long na ka bynta ban ailad ïa ki khun samla ba ki sei madan ïa ki sap ki phong jong ki khun samla kiba don ïa ka sap ha kajingïalehkai Boxing bad lyngba ka jingdon kum kane ka lympung kan ailad ruh ïa ki khun samla ba kin pynleit por ym tang ban lait na ka jingdih ba sniew bad lada ki don shisha ki sap ki phong kan long ruh kum kawei ka lad aikam ai jam ha kane ka juk kyrduh kyrkam kyrduh jam.
Na ka liang ka Kong Marcia Dohliang, Secretary ka Association ka la pyntup ruh yn pynïalehkai ïa kane ka lympung ha ki kyndan jingkhia bapher bapher ba kynthup ïa ki junior naduh ka 30-33 kg, 38-40 kg bad na ka bynta ki senior kan long naduh ka jingkhia kaba 48-kg haduh 67 kg.
Ka Association lyngba u President, u Bah Sumarlang swer ka khot kawer ïa ki samla na ki dong bad ki thain bapher bapher ka Ri Bhoi ba kin wan ban shim bynta ha kane ka lympung bad ka jingwan shim bynta ki khun samla kan ai mynsiem ruh ïa ka Association ba kan dang lah ban kyntiew ïa ki sap ki phong ki samla kiba don sap ha ka jingïalehkai Boxing.
Ïa kane ka lympung ïalehkai ba la tip kum ka Ri Bhoi Boxing Championship la kyrshan lang ruh da ka ophis u District Sport Officer ka Ri Bhoi, pyntip u Bah Sumarlang Swer president ka Association.
