Shillong, Ïaïong 08: Ka Kynhun Myntri ka Sorkar Jylla ha ka sngi Ba-ar ka la mynjur ïa ka Meghalaya Witness Protection Scheme, 2025 ban ai jingïada ïa ki nongai sakhi ha ki jingjia bapher bapher hapoh ka jylla.
Haba ïathuh ïa kane hadien ka jingïalang, u Myntri Rangbah ka jylla Conrad K Sangma ula ong, ba ki don 3 tylli ki aiñ kiba thymmai jong ka BNSS kiba la pyntreikam da ka sorkar pdeng bad ki sorkar jylla bad ha katei ka aiñ kaba thymmai kala don ka kyndon ban ai jingïada ïa ki nongai sakhi bad la wanrah ïa kane ka skhim ban ai jingïada ïa ki nongai sakhi.
U la ong, “Da kaba pynshong nongrim ïa katei, ngi lah mynjur ïa ka Meghalaya Witness Protection Scheme, 2025 da ka jingthmu ban ai ka jingïada kaba kongsan ïa ki nongai sakhi halor ki jingjia ki bapher bapher.”
Haba batai halor kane ka scheme, u Myntri Rangbah ula ong ha man la ki district kin don ki committee, ka ban khlieh da ki district magistrate bad kin don ruh ki dkhot na ki bor sorkar bad kin sa shim ïa ka rai katkum ka jinglong jingman jong ka jingshah byrngem byrsit bad ïa ka jingdonkam ban ai ïa ka jingïada ïa ki nongai sakhi, kaba lah ban long da kaba ai ïa ki nongpahara khnang ba kin lah ban ai ïa ka sakhi ka jong ki ne ban ai ïa ka jingphla lyngba ka camera.
“Kumta ki don bun ki kyndon bapher bapher ban ai jingïada bad kadei kaba la kdew ha ki Rules hynrei kumba nga ong, ka jingmut hi ka long ba kitei ki kyndon kidei kiba la don ha ka aiñ kaba thymmai bad man la ki jylla ki hap ban wanrah ïa ki skhim bapher bapher,” ula ïathuh.
