Shillong, Jylliew 16: Ka Indian Meteorological Department (IMD) ha Shillong ka la maham ba ka jingjur slap ka lah ban dang ïai bteng ha ka jylla haduh ka 20 tarik mynta u bnai. Ka daw ka jingjur u slap kadei namar ba ki lyer slap na sha duriaw Bay of Bengal naduh kine ki sngi baladep.
Shuh shuh ka IMD ka la pyntip ba ka jinghap slap mynta ka sngi ha kiba bun ki jaka jong ka jylla, ha kaba ka ki artylli ki jaka thew slap ha Sohra kidei kiba jur tam. Ka Sohra ka ïoh 673.6 mm, ka RKM ka ïoh 680.8mm. Kiwei kiwei ki jaka ki kham duna na kaei kaba ka Sohra ka ïoh slap.
KHANG KI SKUL: Ka tnat Pule Puthi jong ka Sorkar Jylla ha ka sngi Palei ka la pynbna ban ai shuti na ka bynta saw sngi kynthih ïa ki skul ha haroh kawei ka jylla Meghalaya hadien ba ka Indian Meteorological Department (IMD) MET Centre, Shillong ka la maham ba u lapbah lapsan uba jur un dang ïai bteng ban ther ha kane ka Jylla Meghalaya ha ki san sngi ki ban sa wan.
Kane kan long ruh ka sien kaba nyngkong eh ba ka tnat Pule Puthi jong ka Sorkar Jylla kan pynbna shuti ha ka aiom lyiur namar ka jingjur shaba palat u slap kaba la ktah ïa ka leit ka wan jong ki paidbah khamtam na ka jingtwa khyndew ha surok bad ka jingshlei um ki wahduid bad ki wahbah.
“Baroh ki skul kin khang khyrdep naduh ka 17 tarik, Jylliew haduh ka 20 tarik Jylliew, 2022,” ong u kyrwoh ba la phah da u Commissioner & Secretary ka tnat Pule Puthi ka Sorkar Jylla u Dr. BDR Tiwari.
“La bthah ïa ki Deputy Commisioner ba kin long kiba peitngor ïa ka jinglong jingman ha kine ki sngi na ka bynta ban plie biang ïa ki skul hapoh ki district ki jong ki,” ong u Dr. Tiwari.
Kane ka jingpynbna kan treikam noh mardor na ka bynta ka jingshngaiñ jong ka jingim ki khynnah skul tad haduh ban da pynbna da kumwei pat.