Shillong, Jylliew 16: Ka Meghalaya Pradesh Youth Congress (MPYC) mynta ka sngi ka la pynrem jur ïa ka sorkar India bad sorkar jylla ruh namar ka jingbym lah ban teh lakam ïa ka jingkiewdor ki marbam mardih, ka umphniang kali, ki tyndong ler shet jingshet bad kiwei pat ki jingdonkam kiba la pynlong ïa u paidbah ba duk ban mad jingeh kaba jur .
Ki nongïalam jong ka Seng haba ïakren bad ki nongthoh khubor mynta ka sngi, ki la ther ruh ïa ka sorkar jylla namar ka jingbym lah jong ka ban pynbiang ïa ki dawai dashin ha ki hospital bad ki jaka ai jingsumar sorkar ha kaba kiba bun hi ki nongpang bad nongshim dawai kin hap thied hi dawai na ki jaka die dawai namar ka jingbym shimkhia ka sorkar ban pynbiang dawai.
Ka MPYC ka la pynrem jur ruh ïa ka sorkar NDA, hadien ba ka Enforcement Directorate ka la khot hajir bad tohkit la lai sngi lynter ïa u nongïalam ka seng Congress bad u MP jong ka na Kerela u Rahul Gandhi halor ka kam pisa tyngka jong ka kot khubor National Herald kaba la long trai da ka Young India Limited kaba dei ka kompeni jong ka Congress.
U President ka MPYC u Samla Adrian Chyne Mylliem u la pynrem jur ïa ka sorkar BJP da kaba kynnoh ba kane ka jingleh ka sorkar BJP kaba synshar ïa ka ri ka long tang ka buit jong ka ban ïalam bakla ïa u paidbah ha ilekshon bad ka buit jong ka ban pynklet ïa u paidbah ban ïakren ïa ki kam kiba ka sorkar kam lah ban leh na ka bynta u paidbah nongshong shnong ka ri.
Shuh shuh na ka liang pat jong ka Samla Lakyntiew Sohkhlet ka la ong ba ka jingbym ler jong ka sorkar jylla ban treikam ka long ka daw bah jong ki jingeh kiba ki nongshong shnong ka jylla ki ïa kynduh. Ka Samla Lakyntiew ka la ong ruh ba ka jingbym siew tulop ïa ki nonghikai, ka jingbym siew tulop ïa ki ASHA, ka jingbym siew tulop kaba biang ïa ki nongshet ja ka pynlong ba kin mad jingeh wat ban siew tang ïa ka bai ïing bad ka bai skul khun jong ki. Ka Samla Lakyntiew ka la pynrem jur ruh ïa ka jingbym tuklar lem ka sorkar jylla ha kaba ïadei bad ka jingïakhih ki nongtrei bad nongbylla ha NEHU.
Haba kren halor ka jingïakhih ki nongtrei ka MCCL ban dawa na ka sorkar ba kan siew thikna ïa ka tulop jong ki ka Samla Lakyntiew ka la ong ba namar ka jingbym shimkhia ka sorkar ban pynbha ïa ka rukom treikam ka MCCL ka pynlong ïa kane ka karkhana ban mad jingeh kumba ka mad mynta. Shuh shuh ka la ong ba jin lada ka sorkar ka shimkhia ban pyntreikam ïa kane ka karkhana dei ki paidbah ka thaiñ Sohra kin pahuh ja bad biang kamai.
Haba ïadei pat bad ka jingpaw pyrthei ka jingtrei torti ïa ka paki(Building) jong ka Model College ha Patharkhmah na ka tu Samla Arkin Warjri u la ong ba ha ka jingshisha kat kum ki kyndon lei dei ban don ka lift hynrei ka sorkar kam buh satia kumba la bthah ha ki kyndon ba ka dei ban bud. Shuh shuh u la ong ba ban poi sha kane ka jaka pule wat tang ka surok bad ki lynti synkien kim don satia”kam don jingmut ban shna tang ka ïing lada tang ki lynti ban poi sha ki jaka pule kim don” ong u Samla Arkin.
Haba kren pat halor ka jingkam u Myntri ka tnad pule puthi ka sorkar jylla u Ma Lahkmen Rymbui ba ka jingbym pass bha ki khynnah na ki skul sorkar ka dei beit ba ki khynnah kiba leit dei tang kiba ym ïoh skul shuh ban bteng ïa ka jingpule ha ki skul shimet u samla Arkin u la ong ba ha ka jaka ban kynnoh ïa ki khynnah skul ka Sorkar ka dei ban pynbiang shuwa ki ben bad ki kamra klas namar lada tang ka ben shong bad ka kamra klas kaba ki don ka long kaba jot rathai kumno hi ki kmie ki kpa kin phah skul kum ha kata ka jaka pule ong u samla Arkin.
