Thmu rat ki nongbuaid ïa ki Pulit bad CRPF ha Mendipathar, siat u CRPF, mynsaw uwei

Shillong, ïaïong, 03: Uwei u shipai CRPF u la kum siat bakla da ka suloi ha kaba uwei u nongshong kali u la mynsaw ha ka jingïakynad ha ka por shiteng miet ha Mendipathar, North Garo Hills District.
Katkum ka khubor ba la ïohlum la ïathuh ba kane ka la jia ha ka por 11:30 baje mynmiet ha ka 2tarik mynta u bnai hajan iew Mendipathar.
Ka khubor ka ïathuh ba kawei ka kali rong lieh kaba don ïa u number AS 01 AM 7750 kaba la pynher stet bha ka la ïaid lyngba na ka jaka talasi ba la ap pahara da ki Pulit ka Mendipathar Police Station bad ki Pulit CRPF. La kynnoh ba u nongñiah jong ka kali u la pyrshang ban rat ïa ki Pulit CRPF ha kane ka por kat haduh ba ki la hap ban kynriah ïalade khnang ban lait na ka jingmynsaw.
Ynda ki Pulit CRPF ki la leit shajan ka kali, la ïathuh ba u nongñiah u la pyrshang ban phet biang. Da ka jingsheptieng ïa ka jingshah thombor, uwei u pulit CRPF u la pynap da ka suloi AK bad pyrshang ruh ban plie ïa ka jingkhang jong ka kali, katba ka kali ka dang ïaid, ka suloi ka la bthei kynsan bad uwei uba shong hapoh kali ha ka bynta ba shakhmat u la mynsaw jur na ka bynta ka tyrpeng.
Ïa une uba la mynsaw la ithuh kyrteng kum u Neobirth R. Marak, 28 snem ka rta la pynkit noh sha Mendipathar PHC ryngkat bad ïa u nongñiah la ithuh kyrteng kum u Sengrim K. Sangma.
Namar ka jingjur ka jingmynsaw la pynkynriah noh ïa u Neobirth Marak sha ka jaka ai jingsumar ba kham bha.
Ka kaiphod na ki doktor ka pynpaw ba u Neobirth R. Marak u la buaid kyiad bad um lah shuh ban tehlakam ïalade. Ïa u nongñiah jong ka kali uba la tip kyrteng kum u Sengrim K. Sangma, la lap ba u la dih bun bha ka kiad.
Napoh ka kali la lap ruh ïa ki bilor beer bad ki bor Pulit ki dang pynlong mynta ïa ka jingtohkit halor kane ka jingjia.