Nongstoiñ, Jylliew, 16: Ka jingpynbha ïa ka surok Nongstoiñ-Sohpian kaba jngai tang hynñiew kilomitar, ka la kylla long tang kum ka jingïaleh khun jakai hapdeng ki heh ka PWD, u kontraktor bad ki paitbah. Ki dak ki shin ki paw tyngkreiñ kat haduh ba ka la pynlong ïa ki nongñiah kali bad ki nongleit nongwan lyngba katei ka surok, ba kin rkhie pashait haba ki ïohi ïa ka jingbym ler jong ki nongtrei kiba la buh da u kontraktor ba kin trei ha katei ka surok.
Nalor kata ki paitbah nongleit nongwan bad ki nongñiah, ki la bynthiew bad kren beiñ ha kaba ka la mih ruh ka jingkynnoh ba bun jait ym tang ïa u kontraktor hynrei ïa ki heh ka PWD bad wat ïa u nongmihkhmat ruh u bapli u bym don bynta ei ei. Uwei u rangbah u bym kwah ban pynpaw kyrteng ïalade, u la ong ba ha ki snem ba la dep shuwa ba ka sorkar kan mang pisa ban pynbha ïa katei ka surok, u MLA ka Nongstoiñ bad ki nongkyrshan jong u, ki la ong ba ïa katei ka surok yn shna da ka Intermediate lane.
Ki la ong ba ha ka jingshisha ka Intermediate lane te, lada ïakynduh ar tylli ki kali yn donkam shuh ba kawei kawei kan da ïeng ne ba ki shaka ha kawei ka liang kin dang hap ban ïuh ïa ka ktieh sboh. Hynrei kaba lyngngoh ka long ba ynda la dep pynbha pat ka surok, ka long thik kum u ryngwiang khwai u ba na trai u heh bad katba nang jngai nang rit. Mynta lei lei lada peit bniah ha ki bynta jong kane ka surok, ki la don bun jaka ba ka surok ka la sdang pra.
Nalor kata u la ong ruh ba kaba kham I thamula ka long ba hadien ba ki nongsynshar jong ki hynñiew tylli ki shnong bad ki sengbhalang, ki la hiar ba leit thew hi ïa ka surok bad ki la lap ba kam shym la biang satia u kontraktor imat u la sngew lehraiñ u la phah pynheh biang sa kumba hynriew inshi. Tangba katei ka jingphah pynheh ka long kumba laiphew mitar ka heh kynsan bad ka jingheh ka kut noh. Nangta ki don ruh ki jaka ba ka jingpynheh ka long tang kumba ar inshi.
Ha kaba ïadei bad katei ka surok dang ha ki khyndiat taïew ba la dep, ki nongïalam jong ka FKJGP bad KSU Nongstoiñ circle ryngkat ki ophisar ka tnad PWD, ki la hiar ban thew biang ïa katei ka surok, ha kaba na ka liang ki ophisar ka PWD ki la kular ban shimkhia bad ban bthah ïa u kontraktor ba un phah pynbiang ïa ka jingpynheh ïa katei ka surok. Hynrei haba peit pat ka la shu long tang ka jingpynthame ïa ki nongïalam jong kitei ki sengbhalang.
Lada ka long kumba long mynta, ka pyni shai kdar ba ka don kaei re kaei sha lyndet hapdeng u Myntri ka tnad PWD, ki ophisar ka PWD, u Nongmihkhmat bad u kontraktor. Nangta shaei kito ki nongialam shnong jong ka bynta na Pyndenglawar sha Sohpian kiba la mih teng ban pynpaw halor kane, kynthoh ki riew paitbah bad ki nongleit nongwan.
