Shillong, Lber, 10: Ka Sorkar Jylla ka la aiti sha ka Jana Urban Space, Bangalore na ka bynta ka Barik Redevelopment Project.
Ïa ka tender ladep khot na ka bynta ka National Design Competition, la pyntip u Symbud Myntri Rangbah uba khmih ïa ka tnat Pynroi Sor u Bah Sniawbhalang Dhar haba jubab ïa ka jingkylli hapoh ka Iingdorbar Thawaiñ ha ka Lah Sngi u Blei.
U la pyntip ba ka jingshna ïa ka Barik Complex, kaba long ruh ka jaka ba la rim bha ka don ha ka jaka kaba khapngiah bad ka donkam da ki shlem treikam kiba tbit ha kane ka kam.
Ban pynthikna ba kane ka projek kan long kaba seisoh, u Bah Dhar u la ong ba ka tnat ka la pynlong ruh ïa ka jingbishar kaba bniah ïa ki tender. “Lyngba kane la thmu ban jied tang ïa ki kynhun kiba pynpaw ïa ka jingtbit ha kaba pynwandur ïa kijuh ki jaka kiba la rim, da kaba tyrwa ïa ka jinglah ha ka kam bad ka jingïakob ha ka dor ka mur,” ula ong bad bynrap, “ïa ka kynhun ba la jied la pynshong nongrim katkum ka jinglah ban shna ïa ka projek ha ka dor kaba biang da kaba bat ruh ïa ka Highest Technical Standards.”
Shuh shuh u Bah Dhar u la ong ba ïa ka jingpynwandur la ïasyllok bad baroh ki kynhun ïa kaba la ai jingmynjur da ka Committee jong ka tnat treikam.
Ka dor jong ka Design Consultancy ka long T. 25,00,000 lak, u la pyntip.
