Shillong, LBer 10: U Myntri uba khmih ïa ka tnat Public Health Engineering (PHE) u Marcuise N Marak ha ka sngi Nyngkong u la pyntip ba ïa ka jingkyntiew ïa ka Dadenggre Water Supply Scheme ka la dep bad ïa ka kam ban sam um sha ki longïing ka dang ïaid lyngba ka kor um (FHTCs) kaba la kot sha ki 856 ki longïing.
Haba pynthikna ïa ka jingkylli ba la wanrah da u MLA ka TMC u Rupa Marak, Marcuse u la ong ba ïa kane skhim la wanrah bad mang ha ka 16 tarik u Bnai Naitung, 2021 ha ka dor T. 7,29,18,000.00. Kane ka skhim ka kynthup ïa ki 2 tylli ki shnong kata ka Ajrigre & Dadenggre.
Kane ka skhim ka ai ruh ka jingïarap ïa ka shnong Modelgre kaba dei kawei na ki shnong kiba hap hapoh ka Dadenggre.
“Ïa kane ka scheme la dep ban pyndep bad mynta ka la pynbiang ïa ka FHTC sha ki 856 ki longïing,” ong u Marcuise.
“Ïa ka water storage tank ha Mejadu la tei hapoh ka Dadenggre Water Supply Scheme kaba la mang ha ka snem 1977-78,” u la pyntip da kaba ïathuh ba ka jinglut na ka bynta kane ka mang tyngka ka long T.7.023 klur.
