Shillong Lber 10: Ïa ka sngi burom jong ki longkmie la rakhe ha Mawlai Presbyterian School Ïewrynghep. Ïa kane ka prokram la pynlong ha ka jingïatreilang bad ka Seng Kynthei ka Mawlai Pyllun, kaba kynthup ruh ïa ki 17 tylli ki Dorbar Shnong kiba dang hab ha Mawlai. Ha kane ka prokram la ïohi ïa ka jingïashim bynta jong kiba bun ki longkmie bad ki seng longkmie napoh ka district bad ki thaiñ ba marjan kiba kynthup ruh ïa ki sengbhalang na Sohra, Tyrna, Madan, Riat Laban, bad ka Lympung ki Seng Kynthei, bad kiwei pat ki seng trei mon sngewbha.
Ïa kane ka prokram la sdang da ka jingkren na Dr.Sukjai Swer, ba la don bynta lang ha kane ka prokram. Na ka liang Dr. Swer ha ka jingkren la banjur halor ka jingdonkam jong ki longkmie ha ka imlang sahlang.
Haba banjur halor ka phang “Accelerate Action,” la ong ba kane ka dei ka kam ban wanrah ka jingïalong kawei kaba dei ban sdang shwa na la ïing khnang ba yn lah ban wanrah ka jingïatylli hapdeng ki longkmie.
Na ka liang ka kong E. Kharchandy, District Social Welfare Officer jong ka East District, ha ka jingkren ka la batai halor ki kyndon kiba don hapoh ka Riti Synshar jong ka ri kaba la ai ïa ka hok jong ki longkmie kaba long hapoh ka Article 14-18 bad Article 21. Ka la ong ba ki la don bun ki aiñ kum ka Domestic Violence Act 2005 bad ka Prevention of Sexual Harassment Act 2013 ban ïada ïa ka jingshah leh tohmet jong ki longkmie bad ba ki dei ban ïoh ïa ki hok jong ki.
Katba ka kong Maimai Basaiawmoit, President jong ka Seng Kynthei Mawlai Pyllun, ka la kren shaphang ki jingeh jong ki longkmie bad kiba la mad ïa ki jingeh ha kine ki sngi bad ka la kyrpad ruh ïa ki longkmie ba ki dei ban kren ha kaba ïadei bad ka hok jong ki bad ba kidei ban wan shakhmat ban pan ïa ka hok ha ka jingim jong ki kaba manla ka sngi.
Ha kane ka sngi na ka liang ki khynnah skul ka Seven Hut Mawlai Umthlong ki la ai ïa ka skit halor ka Beti Bachao Beti Padhao, kaba pyni ïa ka jinglong kaba kongsan ban pynkupbor ïa ki longkmie bad ki kynthei. Ka la don ruh ka jingshad na ka kynhun Mawlai Nonglum Dance Academy bad kiwei pat ki prokram.
