Shillong, Lber 09: Ka Synjuk ki Seng Kynthei Katholik, Archdiocese Shillong, Zone II ryngkat bad ka pyrthei baroh kawei ka la rakhe ïa ka sngi bakyrpang jong ki kynthei kaba la tip kum ka “International Women Day’sha ka lympung jingïakynduh lang kaba la long ha ka Sngi u Blei ha Pynthorumkhrah Parish, Shillong.
La sdang ïa kane ka lympung da ka ka nguh ka dem Blei ba la tyrwa da u Spiritual Director jong ka Synjuk ki Seng Longkmie Katholik Zone II u Fr. Augustin Kottala ha kaba la synran lang da u Fr. Laurence Nongkseh Parish Priest bad u Assistant Parish Priest Fr. Alister Marweiñ, ki nongkitkam jong ka Synjuk na ka Central Body, ki Seng Kynthei na ki khyndai tylli ki tylli ki Parish ba kynthup ïa ka Pynthorumkhrah, Laitumkhrah, Nongthymmai, Nongmynsong, Mawpat, Mawpdang, Umpling, Nongrah.
Kane ka dei ruh ka sien khatduh ba ka Seng Kynthei jong ka Pynthorumkhrah kan don ha ka Zone II bad mynta la pynhap noh sha Zone-I katkum ka jingpynbeit na ki bor kiba halor ka Balang.
Haba rakhe lehkmen ïa ka sngi kyrpang jong ki kynthei, ki nongkitkam jong ka Synjuk da ka jingïalam lynti jong ka Maria ka nongïada jong ki longkmie ka la leh ïa ka kam phylla kaba la ktik ïa ka mynsiem bad ka dohnud jong ki longkmie ban kitkhia da ka jingkmen bad jingphuh mut phuhmat ha kaba ka Kong Valerie Blah kaba dei ka ophisar ba la shongthait na ka tnad Social Welfare ka la sam ki symboh jingpyrkhat halor ka phang, “pynstet ban pyntreikam ïa ka jingïaryngkat kyrdan kynthei bad shynrang.”
Ka Kong Valerie ka la pynpaw ba kane ka dei ka kam phylla jong U Blei ban pynkhraw ka long ba ki kynthei ki don ka bynta kaba khia tam ban ïatynrong ïa ka kam ka shon jong ka iing ka sem bad ka imlang ka sahkla. Ka la ai nuksa ïa ki nongïalehkai phutbol haba don kinokino ki jingïalehkai ha ka jingïaleh ka kham shongshit bha haba don ki longkmie ne ki kynthei namarba ki kynhoi ki risa ki ai mynsiem ki nongïalehkai ki ïoh mynsiem.
Ka la pynpaw ïa ka jingkmen ban ïoh ba ki kynthei mynta ki la paw bad kiew shaphrang wat ha ka imlang ka sahlang haba ïanujor bad ki shynrang la ha ka kam ka jam ki la kham tbit ki kynthei.
Ka President jong ka Zone-II Kong Cathleen Pyngrope ka la ai jingkren ïa ka mat treikam khadduh jong ka Zone bad ka jingai kaiphod lyngkot ïa ka jingïaid lynti jong ka seng.
Ha kane ka sngi, ka Synjuk Seng ki kynthei Katholik Shillong Archdiocese Zone-II ka la pynkup burom ruh ïa ki dkhot barim jong ka Zone.
La pynkut noh ïa ka sngi kyrpang da ka jingpynhap ïa ka lama jong ka Synjuk da u Fr. Augustin Kottala bad ka jingaiti ïa ka lama sha ka Parish Laitumkhrah kaba dei ka Zone II.
