Nalor ka SPL yn pynlong ruh ïa ka Champions League mynta u snem

Shillong, Lber 09: Ka Shillong Sports Association ka la pynbna ïa ka kalendar jong ka na ka bynta ka aïom ïalehkai u snem 2025, kaban sdang nyngkong da ka lympung ‘U-20 Fourth Division’ ha u Jylliew, katba ka Shillong Premier League kan sdang ha u bnai Naitung.
La buh ruh ha ka kalendar ïa ka lympung ïalehkai ba thymmai, ka Champions League. Ka Women’s League bad ka lympung ïalehkai jong ki U-16 bad U-14 jong ki khynnah shynrang ruh kin wan biang mynta u snem.
Shuwa ïa kine baroh, ki klob kiba ladep ïasoh bad ka SSA ki donkam ban pynthymmai ïa ka jingïasoh jong ki na bynta u snem 2025. Na bynta ki phom lah ban shim na ka ophis jong ka SSA naduh ka 10 tarik haduh ka 15 tarik u Lber da kaba siew 100 tyngka. Nangta ïa ka phom ba ladep pyndap dei ban ai ryngkat bad ka bai ïasoh kaba T.1,000 ha ki sngi treikam naduh 2 baje mynsngi haduh 5 baje janmiet shuwa ka 33 tarik u Lber.
Ka jingïasoi ban pynkynriah rangïalehkai hapdeng ki klob (inter-club transfer window) kan plie ha u ïaïong. ïa ki phom yn sa die ha ka taïew ba nyngkong jong u bnai ïaïong, 2025, bad ka jingïasoi ïa ki rangïalehkai kan long hapdeng ka 21 tarik bad 30 tarik u ïaïong.
Nangta yn sa khot ïa ki jingpynrung kyrteng ban ïashim bynta (entry) na bynta ka lympung U-20 Fourth Division bad Third Division ha ka taïew ba nyngkong jong u Jymmang, ha kaba ka U-20 Fourth Division kan sdang ha ka 02 tarik u Jylliew bad ka Third Division ha ka 16 tarik Jylliew.
Ka Entry na bynta ka Second Division kan plie ha ka taïew ba nyngkong jong u Jylliew, bad ka tarik ban sdang ïa ka lympung kan long ha ka 07 tarik u Naitung. Yn plie ïa ka Entry na bynta ka First Division ha ka taïew kaba lai jong u Nailar, ha kaba ka league kan sdang ha ka 15 tarik u Nailur.
Ka SPL, kaba la shim por kham slem mynta ka samoi (bad kam pat kut wat mynta ruh), kan sdang hashwa ka First Division, ha kaba yn plie ïa ka Entry ha ka taïew ba ar jong u Jylliew bad ka tarik sdang kan long ha ka 14 tarik u Naitung. Kumban shu kdew hangne, ka SPL 2024 ka la sdang ha u Risaw hynrei kam pat shym la kut haduh mynta, da ka jingpynslem namar ka jingdon jong ka Meghalaya State League bad ka jingïashim bynta jong ka jylla ha ka Santosh Trophy.
ïa ka SSA Women’s League kan long shuwa ki bnai ban kut jong u snem 2025 (lah ban long ha u bnai Naiwieng-Nohprah), katba ïa ki lympung ïalehkai U-14 bad U-16 ruh la pynbeit ban pynlong ha kajuh ka por.
Ka samoi ïalehkai 2024 kam shym la don satia ïa ki lympung ïalehkai U-12, U-14 ne U-16 kiba ju long, ha kaba tang ki ar tylli ki kyrdan (U-14 bad U-16) la kynthup mynta na ka bynta u snem 2025.
Ha ka kalendar ka la kynthuplang ruh ïa ka lympung Champions League. Kane ka lympung ban pynlong ha ka sien ba nyngkong la thmu ban pynlong ha u snem 2024 hynrei ym shym la lah ban pynrung namar ka jingkhim ka por ba la pynjlan ïa ka SPL. Katkum ka jingthmu ba nyngkong, kane ka lympung ka long ban kynthup ïa ki 10 tylli ki kynhun lahduh bad kiba wan ba ar ha baroh san tylli ki lympung ïalehkai jong ki shynrang (4th, 3rd, 2nd, 1st bad SPL) ba la pynïaid da ka Shillong Sports Association [SSA] bad ban phiah ïa ki ha ki ar tylli ki Group, ryngkat bad ka wat ïakhun knock out ban bud hadien ka round robin stage.