Shillong, Rymphang 23: Ka Shillong All Faiths Forum (SAFF) ka la rai ban pynshlur ïa ki dhot jong ka ban ai ka jingkyrshan kaba pura ïa ka sorkar jylla ha ka jingïakhun ïa ka thma pyrshah ïa ka jingsniew kaba mih na u drok.
Ïa kane ka rai la shim ha ka jingïalang kaba la shim ha ka jingïalang general body kaba la long ha Umshyrpi college.
Ha ka jingïalang la munjur ruh ban pynskhem ïa ki nongkitkam kiba thymmai jong ka SAFF na ka bynta kane ka samoi treikam jong ka. La jied President biang ïa u Rev Bishop P Lyngdoh, Vice President, Naba Bhattacharjee, General Secretary, Noor Nongrum, Assistant General Secretary Arup Barua, Treasurer Jasbir Singh bad u Rev Kharkongor kum u Media assistant.
“Ka SAFF ka pynpaw ka jingïaroh ïa u Myntri ka tnat Social Welfare bad ka kynhun jong u halor ka jingïalang kaba la pynlong dangshen bad ki nongïalam ka SAFF ha nongbah. Ngi pynpaw ka jingshaniah hapoh ka projek DREAM jong ka tnat Social Welfare hapoh ka jingkhmih jong u Mission Director u Bah Francis G Kharshiing, bad kumjuh ruh ki dkhot bad ki nongïalam ka SAFF na baroh ki niam kin pynthikna ïa ka sorkar ba kin kyrshan ïa kane ka jingpyrshang ban pyllait ïa ka jylla na ka jingsniew kaba mih na u drok bad kiwei ki jingsniew kiba la sar kum ka khlam ïa ka imlang sahlang jong ngi mynta,” ong u General Secretary ka SAFF u Bah Noor Nongrum.
Ka SAFF ka kyrpad ïa baroh ki dkhot bad ki unit ban shim khia ban ïoh ïa ki riewshemphang, technical bad ka jingkyrshan pisa na ka sorkar jylla hapoh ka Drug Rehabilitation, Elimination and Action Mission Project DREAM ban pynsuk bad ban pynlong ïa ki prokram bapher bapher ha ki jaka pule jong ki bad kumjuh ruh ba kin leit jngoh barabor ïa ki jaka pule, u la ong, da kaba bynrap ba ka SAFF kan ïalam lynti bad kyrshan ïa ki dkhot ha kane ka jingpyrshang bad ban don bynta ha kine ki prokram.
