3000 klur tyngka shah ram ki nongtrei MeECL ha ka sorkar

Shillong, Jylliew 13 : Ki nongtrei jongka Meghalaya Energy Corporation Limited (MeECL) ki shah ram haduh 3000 klur tyngka ha ka sorkar bad kane ka dei ka jingïoh ( terminal benefits) ba ki dei ban ïoh na ka sorkar naduh ba la pynkylla kompani MeECL ïa ka MeSEB. Halor kane na ka liang u Symbud Myntri Rangbah u bah Prestone Tynsong ula kular ïa ki nongïalam ka Coordination Committee of Registered MeECL Employees Associations and Unions (CCORMAU) mynta ka sngi ban thaw lad khnang ba ka sorkar kan ïoh ban siew ïa ka hok jong ki nongtrei kane ka tnad pynmih bording.
ïa kane la ïathuh sha ki lad pathai khubor da ki dkhot jongka CCORMAU hadien ka jingïakynduh ïa u Symbud Myntri Rangbah mynta ka sngi. Na ka liang u Vice President jongka kynhun u bah Arju Dkhar ul a ïathuh ba kane ka terminal benefits ne ka jingsiew ba ki nongtrei ki dei ban ïoh ka dei ka mat kaba la la ïai ïakren bad ka sorkar namar hadien ba la pynkylla ïa ka MeSEB sha ka kompani MeECL kane ka dei kawei na ki mat jingïateh ha ka soskular ba la ïasoi.
“ Ngi la kren shai bha halor kane hakhmat u Symbud Myntri Rangbah uba dei u myntri jong ka tnad jong ngi ba ka sorkar ka la pheil ban pyntreikam ïa ki kular jongka” ong u bah Dkhar.
U la ïathuh ba kat haduh u Lber 2010 kane ka jingsiew ïa kane ka terminal benefits ka dang long tang 840 klur hynrei mynta namar ba ka la nang lang nang lang ka la kot shaduh ka 3000 klur tyngka bad ka daw ka long ba ka sorkar kam shym la siew naduh kaba sdang.
“Ha ka jinshisha na ka liang ka MeECL kala khot tender na ki kynhun ban shim jingkheiñ halor kane ka terminal benefits hynrei wat la katta ruh na ka jingkheiñ ba ngi la ïoh lum kam duna shuh ïaka 3000 klur tyngka” ong u bah Dhar
Haba la kylli hato ka sorkar ka don pisa ban siew haduh kattei shaki nongtrei ka MeECL u bah Dkhar u la ong “ Ngi sngewkmen bad ai khublei ïa u symbud myntri rangbah uba la kular ban shim khia ban thaw ki lad ki lynti kumno ban lah ban siew ïa kane ka pisa sha ki nogntrei. Ngi kyrmen ba ngin ym mad shuh ïaki jingeh la ka dei ïa kine kiba dang trei ne ïa kiba la shongthait ruh ki dei beit ban ïoh ïa kane ka hok ba ki dei ban ïoh bad ka Committee ruh ka ngeit skhem ba ka sorkar kan sa leh ei ei beit halor kane.
“ Ngi ngeit skhem ba kiei kiei baroh kin ïaid beit namar kane ka kam ka la shu sahteng mynta la 10 haduh 12 snem ei ei tang na ka daw ka jingpynslem jongka sorkar. Ki don ki khep ba la hap ban pyndonkam noh da ka pisa ba dei ban pyntrei ïaki projek bad ïa ka pisa ba ïoh lum ban siew ïa kane ka terminal benefits sha ki nongtrei bad kumjuh ruh sha kito kiba la shongthait” ong biang u bah Arju.
U la ong kam long kaba suk ïa ka sorkar ban siew shisien siew ïa katei ka pisa hynrei kan don ka jingbuh bhah kyrpang na ka bynta kane ka jingsiew ym shuh ban siew nangne nangtai hynrei kyrpang beit tang ïa kane kaba dei ban ïoh.
Ha u snem ba la dep ka CCORMAU ka la byrngem ban ujor FIR ïaka sorkar halor kane ka jingpynslem ban siew ïa kane ka pisa sha ki nongtrei ka MeECL.