Shillong, Rymphang 21: Palat 7 lak ngut ki khynnah skul ha Meghalaya ki la ïoh jingmyntoi na ka Pradhan Mantri Poshan Shakti Nirman (PM POSHAN).
Ïa kane la ïathuh da u Director ka tnat Education & Literacy u Swapnil Tembe hadien ba la pynlong ïa ka jingïalang ka state level steering cum monitoring committee na ka bynta ka skhim PM POSHAN, kaba ai ka jingbam ïa ki khynnah klas I haduh ka klas kaba VIII kiba leit ha ki skul sorkar bad ki skul ba ïoh jingïarap na ka sorkar.
“Ki la don palat 7 lak ngut ki khynnah jong ki skul sorkar bad kito ki skul ba ïoh jingïarap na ka sorkar kiba la ïoh ïa ka bam batei met hapoh kane ka scheme,” ïathuh u Tembe sha ki lad pathai khubor.
U la pyntip ruh ba ka jingmang baroh ka la kot sha ka T. 130 klur ha u snem ba la dep bad kane ka kynthup ruh ka jingpynlut na ka bynta ki nongshet bad ki nongïarap, ka jinglut ha ka bam, ka kit ka bah bad kiwei kiwei.
U la ïathuh ba hapoh kane ka scheme, kumba 80 per cent na ki skul kiba don ha Meghalaya mynta ki la ïoh ka bam kaba tei met bad ba ka sorkar ka la buh ka thong ban pynkynjoh sha ka 100 per cent ha une u snem.
“Kumta nga sngewkmen ba mynta hadien ki jingpyrshang kiba bun ki skul kiba la ïoh ïa ka bam kaba tei met ka la kiew na ka 9% sha ka 80% bad mynta u snem ngi buh ka thong ban pynpoi sha ka 100%,” u la ong.
Haba batai shuh shuh, u director u la ong, “Ka school nutrition garden ka long kum ka kitchen garden ha kaba ki khynnah ki tip kumno ban thung ïa ki jhur bad ki soh bad ki sumar ïa ki bad hadien ba ki la heh la san ki kheit noh ïa ki bad ban pyndonkam ha ka bam, bad baroh kiba la bret na ki jaka shet jingshet la bret biang sha ki jaka thung jingthung bad ki kper.”
U la ong ba katkum ka school calendar, kawei ka sngi la aiti na ka bynta ka school nutrition garden haba ïathuh ruh ba palat 20,000 ngut ki don ki nongshet nalor kiba ïarap bad kumjuh ruh ïa ki khlieh jong ki skul bad nonghikai kiba la dep ban ai jinghikai mynshem snem da ka jingïatreilang bad ka NESFAS.
“Ngi ju pyllong bun ki jingïakob shet jingshet ha kaba ki nongshet bad kiba ïarap ki ju ïashim bynta bad la ju ai ruh ki khusnam sha kiba jop,” u la bynrap.
U Tembe u la pyntip ruh ba ki jingeh ba mad ha kaba pyntreikam ïa ka scheme ka dei ka jingbym don ki LPG cylinder bad bun la hap ban pyndonkam da ki dieng thang ban shet jingbam.
Katkum ka jingong jong u, ka sorkar ka dang pyrshang ban pynïoh ïa ka model kitchen sha ki school.
Ha kajuh ka por u Tembe u la ong ba la dep ban pynlong ïa ka jingïalang na ka bynta ki rukom pyrkhat na ka bynta ka snem ban wan.
“Da ka jingkyrmen ngin bteng ïa kane ka bynta ban pynbha ïa ka jingai jingshakri lyngba kane ka skhim,” u la bynrap.
