Shillong, Rymphang 21: Ka tnat District Council Affairs ha ka sngi Thohdieng ka la ong ba ka jingpynkhreh na ka bynta ka jingñiew ïa ki vote ka elekshon autonomous district council (ADC) ka la ïaid shaphrang bad kane ka jingñiew ïa ki vote ka ban long ha ka 24 tarik mynta u bnai.
Lah ban ong ba ka jingthep vote sha KHADC bad JHADC ka la kut ha ka sngi Thohdieng.
“Ka jingpynkhreh na ka bynta ban ñiew ïa ki vote ka la ïaid shakhmat,” ong u Commissioner & Secretary ba khmih ïa ka tnat DCA u Bah Cyril Diengdoh sha ki lad pathai khubor ha ka sngi Thohdieng.
U la pyntip ruh ba ïa ki jingai jinghikai la dep ban ai sha ki briew kiba dei ban don ha ka kam ban ñiew ïa ki vote da ki Deputy Commissioners (DC) bad ki Returning Officer (RO).
Haba ong ba la dep ban buh ïa ki jaka ñiew vote u Bah Diengdoh u la ong ba na ka bynta ka KHADC, kin don lai tylli ki jaka ñiew vote ha East Khasi Hills District kaba kynthup ïa ka ophis SDO Civil Sohra, ka Pynursla Civil Sub-division bad ka Inter-State Bus Terminus (ISBT), Mawlai Mawïong.
“Kiwei pat ki jaka ñiew vote kidei ki jaka ha ki ophis DC bad kiwei pat ki jaka ba la dep ban pynbna mynshwa,” u la bynrap.
