Shillong, Jylliew 13 : U Myntri uba dei peit ïa ka tnad Social Welfare u ma Kyrmen Shylla ula rai ban ai jingthoh sha ka MeECL naka bynta ban ïarap pisa ïa i khynnah rit ba dang 3 snem ka rta iba la duh noh ïa baroh ar tylli ki kti na ka daw ka jingshah bat ha ka bor ding ilektrik ha ka shnong Mawkohphet, South West Khasi Hills ha ka 21 tarik Iaiong 2022.
“ Ngan sa ai da ka shithi sha ki bor ka MeECL halor kane ka jingjia ba kin ïarap pisa ïa ka ïing ka sem ine i khynnah rit namar ine i khynnah i don ka hok ban ïoh ïa ka jingsiew bailut ksan na katei ka tnad”. ong u ma Kyrmen.
“ Na kata ka daw ngan shim khia hi da lade halor kane bad ïa kiei ki jingdonkam ruh ngin ïaleh katba lah ban iarap na ka liang jongngi” ong u ma Kyrmen.
Na ka liang ki seng bhalang ki la dawa ba ka tnad MeECL ka dei ban siew shirta jingim ïa kine i khynnah rit iba la duh ïa baroh ar tylli ki kti tang na ka daw ka jingleh khlem akor jong ki briew katei ka tnad. Nalor kane ki la dawa ruh ba dei ban siew lut nadong shadong da ka MeECL ïa ki jinglut jingsep ha kaba ïadei bad ka jingsumar ïa ine i khynnah ha NEIGRIHMS.
