Shillong, Jylliew 13 : U President ka UDP, Bah Metbah Lyngdoh ha ka sngi Nyngkong u la pynbna ïa u Bah Remington Pyngrope ban long u kyrtong jong ka party na Mawkynrew Constituency ha ka elekshon MLA kaban long shen ha u snem ban wan.
Ïa u Bah Reming u ba la resaiñ noh dang shen na ka NPP la wan ban pdiang burom lang naduh u Vice President Bah Allan Dkhar, President Women’s Wing, Kong Pretty Kharpyngrope, Bah O Suin, Vice President ka East Khasi Hills, Bah Ryngkat Lyndem MDC bad President Youth Wing East Khasi Hills nalor kiwei kiwei ha ka jingïalang kaba long ha Maw-u-Sam kaba don harum Smit.
Ha kane ka sngi, wat hapdeng u lapbah ba jur, ki nongkyrshan jong ka UDP Mawkynrew ki la shah beit haduh kaba kut ban sakhi lang ïa ka jingpdiang burom ïa u MLA barim ka Mawkynrew, Bah Remington Pyngrope sha ka UDP.
Lah ban kdew hangne ba u Bah Remington Pyngrope u la jop haduh arsien kum u MLA na Mawkynrew bad shisien pat kum u MDC, hynrei u la shah rem noh pat ha u 2018 hadien ba u la leit ban ïakhun na ka tiket NPP.
Haba kren ha kane ka sngi, u Bah Metbah u la pynpaw ïa ka jingkmen kaba khraw ba ki ïoh ban pdiang burom ïa u Bah Reming uba la mih noh na ka NPP ban wanphai biang pat sha ka iing kaba rim, kata ka UDP.
Da kaba pynpaw ïa ka jingkmen ban ïohi da ki hajar ngut ki paidbah kiba dang ieid bad bud lang bad utei u nongmihkhmat barim sha ka UDP, u Bah Metbah u la ong ruh ba um artatien shuh ba ka UDP kan sa jop na katei ka constituency.
Shwa kane u Bah Reming ha ka jingkren ba lyngkot u la ong ba ym dei tang ma u ba pynïasoh sha ka UDP hynrei u la wan ryngkat bad ki hajar ngut ki nongkyrshan.
U Bah Reming u ong ruh ba ka rai ba u shim ban pynïasoh sha ka UDP kam dei satia ba u shu rai marwei hynrei kadei kaba u la da ïa syllok sani bha bad ki nongkyrshan haman la ki shnong.
“Dei ki nongkyrshan kiba pynbor ba nga dei ban leit ïakhun biang na ka party kaba la pynjop 10 snem kum u MLA bad san snem kum u MDC,” la bynrap biang u Bah Reming.
Na ka liang u Bah Alan Dkhar ba dei u Vice President ka party u la ong ba ha ki khyndiat por ba u Bah Metbah u shimti kum u President u la lah ban kyntiew ïa ka jingdon ki MLA ha Ïing Dorbar na ka 6 ngut sha ka 8 ngut bad ban pynsawa ïa ka bom kylleng ki jaka.
U Bah Ryngkat Lyndem, President ka Youth Wing jong ka East Khasi Hills u la ïaroh ïa ka sienjam ba shim da u Bah Remington Pyngrope ban wanphai biang sha ka UDP. U kyntu ruh ïa ki nongkyrshan ba kin trei borbah sa shisien pat ban pynjop biang ïa u Bah Reming kum u MLA ba thymmai ka Mawkynrew.
“Hadien ba i Bah Reming i khlem jop shuh mynta pat ka plie lad biang ïa phi ki ban ïoh biang ïa u nongmihkhmat uba peit ïa ka khia ka shon bad ka jingeh jong ki nongrep,” u la ong.
U la wer ruh ïa ki samla ban mih shakhmat ban trei na ka bynta ki kam jong ka party khnang ba ka jingpynkhreh na ka bynta ka elekshon MLA ha u 2023 kan long kaba paka.
Na ka liang u Bah Oland Suin, Vice President jong ka UDP East Khasi Hills u la ong ba katei kadei ka dak jong ka jingsdang jong ka jingkyrmen na ka bynta u Bah Remington sa shisien pat ha ka saiñpyrthei.
“Balei baroh ki kwah ban wan pynïasoh sha ka UDP namar kine ki tip ba kane kadei ka party kyrpang na ka bynta jongngi ki paidbah ka jylla,” u la ong.
Ha kajuh ka por u la ong ruh ba na ka party ki sngewkmen haduh katta katta ba ki ïoh ban pdiang burom biang ïa u Bah Reming sha ka party hadien san snem ba ki la duh ïa u.
Ha kane ka sngi ka la don ka jingpdiang burom ïa ki longkmie na kiwei pat ki party da ka President Women’s Wing Kong Pretty Kharpyngrope bad ïa ki rangbah pat kiba wan na kiwei ki party la pdiang da u Bah Metbah bad Bah Reming.
