Mairang, Rymphang 20: Ha ka jingkhmih lynti ïa ka jingñiew vote na ka bynta ka elekshon sha ka Khasi Hills Autonomous District Council ka ban long ha ka 24 tarik Rymphang 2025, ka District Magistrate jong ka EWKHD ka kong Anita Kharpor IAS, ka la pynmih hukum katkum ka kyndon 163 jong ka BNSS, 2023, ban pynthikna khnang ba kan don ka jingshong suk shongsaiñ bad ka jingïaid beit ïaid ryntih ha ka jingñiew vote.
Ka jingñiew ïa ki vote ha katei ka sngi kan long ha ophis DC ha Mairang, bad katkum ka kyndon yn shah ban rung tang ïa ki briew ba la ai bor kiba don ïa ki ID Card kiba biang lane ki Pass kiba la ai da u Returning Officer.
Katkum ki hukum haneng la khang ban rung khlem jingbit ïa kino kino ki kali sha ki jaka ñiew vote ha ka jingjngai kaba 200 meter na ki counting centre, lait noh tang kito kiba dei jong ki heh sorkar kiba don ha ka kam kiba don ïa ki pass kali kiba biang.
La khang pyrkhing ïa ka leit ka wan ha ka surok NH-44E naduh Mairang Bye-pass junction shaduh DC residential quarter junction naduh ka por 7 baje mynstep haduh ka por 1 janmiet. La khang ruh ban pyndonkam ïa ki loud speaker hapoh ka jingjngai kaba 200 meter, ki jingpynieng kali ha ki surok bah National Highway 44E bad ki surok District.
La khang ban rah ïa kino kino ki jait tiar kiba lah ban pynmynsaw, ki jingïalang bad ki jingïaid paidbah hapoh 200 meter na ka jaka kheiñ vote haduh 48 kynta hadien ba la pynbna ïa ka result. La khang ban ïalum paitbah palat ïa ka 5 ngut hapoh 200 meter na ka jaka ñiew vote hadien ba la dep ñiew vote.
Kine ki sien jam ki long ban pynthikna ïa ka jingñiew vote kaba laitluid, kaba hok, bad kaba ïaid beit ïaid ryntih. Ki bor pynïaid ki kyntu ïa baroh ki nongshong shnong ban ïatreilang bad ki hukum.
Shuh shuh na ka liang u General Observer ka Eastern West Khasi Hills District Mairang, u la pyntip paidbah sha baroh ki nongshong shnong jong ka Eastern West Khas Hills District Mairang, ba u General Observer na ka bynta ka elekshon sha ka Khasi Hills Autonomous District Council 2025, u Dikki D.Shira, u la wan poi ha distrik bad ka jaka shong treikam jong u ka long ha Circuit House Mairang.
Na ka bynta kino kino ki jingtip bad jingujor ha kaba ïadei bad ka elekshon, ki agent bad ki paidbah ki lah ban pyntip sha u lyngba une u phone nombor 98560-78607.
Ïa kane la pyntip paidbah da ka Deputy Commissioner ka Eastern West Khasi Hills District, Mairang.
