Nongstoiñ, Rymphang 18: Ka ïing u Phadar Covinshal Wanñiang uba la shah pynkyntang Lyngdoh dang shen ha ka sngi baar ka la pynlong ïa ka jingïaseng kyrpang kum ka jingïaseng sngewnguh na ka ïing baroh kawei.
Ïa ka jingïaseng la pynlong ha madan shnong Nongkaniang Nongstoiñ, ha kaba la sdang ruh ïa ka jinglehniam da ka jingïaid proseshon bad la tyrwa ïa ka Mass Bakhuid da u Fr. Covinshal Wanñiang ryngkat ka jingïasnohktilang u Fr. Jobi Mathew OFMCAP 1st Councilor, u Fr. Brilliant OFMCAP Councilor, Fr. Vinesh OFMCAP, Fr. Jenes Wanñiang, Fr. Telesphores Nonglang, Fr. Resto Shylla bad kiwei kiwei.
Ha kane ka sngi ka ïing ka la ai ruh ïa ka jingai sngewbha ïa ki riew nïam ïa baroh kynthup ïa ki Lyngdoh kiba la ïadonlang, ki sister, ki head caticates ki riew rangbah ka balang Katholik bad kiwei kiwei.
Hadien ka jinglehniam la ot ïa u Cake bad ki samla na ki Balang bad na ka Jylla Niam Nongstoiñ ki la pynbyrngia da ki jingrwai ki jingshad Gospel bad kiwei kiwei ki jingpynbyrngia.
U Fr. Covinshal Wanñiang u dei u khun ba hynñiew jong u Bah Puisting Kharbani bad ka Kong Ester Wanniang na ki 8 ngut ki shipara kynthup ïa ki 3 ngut ki kynthei bad 5 ngut ki shynrang. La kha ha ka shnong Nongkaniang kaba dei kawei na ki shnong nongkyndong ha ka thaiñ Nongstoiñ bad kaba dang sahdien bha ha baroh ki liang.
Na shnong Nongkaniang bun ki soh kiba thiang ki la mih kynthup naduh ki nongîalekai kiba la leit ban ïashim bynta ha ki klob bapher bapher jong ka sor Shillong bad sha Ri thor jong ka Ri India, nangta ki ophisar, ki pulit, ki shipai, ki Nurse, ki brother ki sister bad ki lai ngut ki phadar.
Kaba kham sngew tynnad ka long ba ha ka shnong Nongkaniang ka don tang kawei ka Balang kata ka long ka Balang Katholik, ha kaba ki don haduh 100 tnum ïing eiei ki longïing haba kheiñ kyllum lang baroh haduh kine ki sngi.
