Ka Phawer u Aesop ka la maham lypa ïa ngi baroh,’ Nang bun u bynriew, nong roi ka byrsieh.’ Kumba ruh ka long shisha mynta, kane ka pyrthei ka la jot, kane ka pyrthei ka la tap sa tang da ka pop ka sang suda kat sha phai, ka sniew ka smeh, ka thok ka shukor baroh kin kynrei lut mynta. Ym don ba sngap shuh ïa ka Hok bad ïa ka Jingshisha namarba la kren briew lut ka pisa ha baroh ki kam. Leh kano kano kaba pap ne kaba sang, leh ïa kano kano kaba pyrshah ïa ka mon u Blei, ïa kata, ki briew kin ïaroh bad ai burom pynban ïa kum kita.
Haba la kren briew ka ‘eit Ksuid’ (ka pisa), ka Hok ka jah sa kyndong When money speaks,the truth kees silent). Peit keiñ mynta ha baroh ki liang, katba ka kamai ka kajih bad ka kam ka jam ka la nang ring sdot ring swai, ka kam khaii pateng ka la nangrit nang sdot man ka sngi, katba nang kordit bad jynjar ki paid trap ki paid knup, ki luk ki lak bad ki thap ki dap baroh, hynrei, katta pat nang rben ka ‘eit Ksuid’ (pisa) tang ha ki katto katne ngut.
Lada leh ïa kaba dei, kaba shisha bad kaba hok, ym don ba sngap shuh mynta. Lada phi nud bam lamler, leh ïa kaba pop kaba sang bad ka bym dei, leh da ka buit tuh ka arsap ka ar phong, leh ïa ki kam bym man, kata te, kin mane bad nguh ïa ki la kumba nguh ïa U Blei. Ban kamai ïa ka Hok kumba ong ki Khasi hyndai, ban nym tuh ne thok ne shukor kumba la thoh ha ka Shiphew Hukum, kata, ka la kylla kamkai lut baroh mynta.
Ki briew kiba hok, kiba bha bad kiba shisha mynta ki don sa tang khyndiat eh. Bun kiba la ngop lut sha ka pop ka sang, ka thok ka shukor bad ki jingthala ba laitphew jait jong kane ka pyrthei mynta. Ki briew kiba bha, kiba beit bad kiba shisha ki don thoh mut thoh mat khyndiat khynsoit hangne hangtai. Ki la kylla long noh tang kum ki jaka seisoh ha ka jaka ri shyiap kaba heh bad kaba ïar they are like little oasis in the desert of barbarism).
Lada lah bun kiba kwah leh pop ban ïa kiba leh hok, kata, kane ka pythei ruh ka la kylla long noh kum ka ‘paradise’ jong ka dujok ne ka ri jong ka pop. Hato, kito kiba dang pyrkhat ïa kaba hok, kaba dei bad kaba shisha kin leit ïa ngop lang noh bad kine ki riew bymman (wicked people)? Hato, ka jingïatip lem kiba hok ka shah ïa ki ban ïa ngop lang noh kumta?
Ki ju ong ba ka histori ka ju wan jia biang ïa kajuh ka jingjia history repeat itself). Lada kane ka dei shisha,ka juk u Noah bad ka ing lieng (Ark) jong u kan wan jia biang ïa kine ki briew kiba la leh ïa ka pop ka sang ha kane ka pyrthei haduh katne. Lada phai pat sha ka histori u Hynñiew Trep u Hynñiew Wasa, ka juk jong ka Diengiei (ka juk jong ka Pap ka Sang) kan wan jia biang. Tip dang don neem ka Phreit ban ïathuh lem ba wan jliah u Khla ïa ka Diengïei khnang ba u khun bynriew un tip ïa kata mynta? Lane, ka juk ba ka Sngi (ka Hok ka Shi kyntien) ka la leit rieh noh sha krem lamet sha krem latang, tip dang don neem u ‘men lyngkhoit u men lymboit’ (u Syiar krad jutang) ha kane ka juk mynta u ban dang lah ban pynngeit biang ïa ka sngi (ka jingshai halor ka Hok ka shi kyntien) ba kan wan phai biang sa shisien sha kane ka pyrthei?
“Shwa ban paw u Ksuid u Khrei, baroh ki mane ïa u Blei.’ Ynda lah bun palat kiba stad pat, kumba ka long mynta, u Soso Tham u thoh, ‘Long Syiem ka Dum, Synshar ka Bieit, Ka long Raiot ka Tieng ka Smiet, Ka Hok ka shong ha Shnong u Blei, Ka Pdok (pla pisa ne synduk pisa) u Briew ha Snieh Pyrthei.’
