Shillong, Jylliew 13 : U Myntri Rangbah ka jylla u Conrad K Sangma ha ka jingïadonlang u MLA ka North Tura u Thomas A Sangma u la pyllait paidbah ïa ka Payment for Ecosystem Services (PES) Scheme bad sam ruh ïa ki cheque sha ki Producer Group kat kum ka prokram FOCUS ha ïing ophis SMELC , Tura mynta ka sngi.
U Myntri Rangbah u la ong ba kane ka skhim ka long ban ïarap ïa ki shnong bad nongrep kiba ïada ïa ka mariang.U la ïathuh lyngba ka PES kiba bun ki nongrep kin ïoh jingmyntoi bha. U la ong ba ha kine ki saw snem shiteng ka sorkar MDA hapoh ka jingïalam ka NPP ka la thaw bun ki skhim ban ïarap ïaki nongrep. Lyngba kane ka skhim ka sorkar kan ïarap 15,000 tyngka shi hectare ka jaka ban pynneh pynsah ïa ka mariang bad ka la mang 50 klur tyngka shisnem ban ïarap ïa ki shnong, ki kynhun trei lang bad ki nongrep kiba ïada ïa ka mariang.
U Thomas A Sangma haba pynshai shaphang ka Village Natural Resources Management u la ïathuh ba hadien ka Himachal Pradesh ka Meghalaya ka dei ka jylla ba nyngkong ban pyntreikam ïa ka PES Scheme ha kane ka thaiñ shatei lam mihngi ka ri India. U la ai ka jingïaroh ïa u myntri rangbah uba la pyntreikam ïa kane ka skhim ha kane ka jylla Meghalaya.
U Additional Project Director ka CLLMP u Gunanka DB ha kaba pynshai halor kane ka skhim u la ban jur ban pynneh pynsah ïa ka mariang bad ki khlaw ki btap bad ula kyntu ruh ïa ki shnong ki thaw ban thaw da ki kynhun trei mon sngewbha ban ïada mariang khnang ban ïoh jingïarap na kane ka skhim.
U Nokma ka Baladinggre A.King u Klason T Sangma uba dei ruh uwei na ki dkhot ka PES u la pynshai halor ki jinglap bad jingshem jongu ïa kane ka skhim bad u kyntu ïa baroh ban ïasnoh kti lang ban pynneh pynsah ïa ki khlaw ki btap khamtam sawdong ki tyllong umdih.
