Shillong, Jylliew 13: Ka Khasi Students’ Union, South Khasi Hills District Unit, ha ka 13 tarik u Jylliew 2022 ka la ïoh ban aiti noh ïa ka ïing sha i Kong Phlaris Nongkhlaw hapoh ka dong Lummawkong jong ka Shnong Laitkroh.
Ha kane ka sngi lah ioh ban aiti ia katei ka ïing da u Samla Donald V. Thabah, Generel Secretary ka KSU CEC u ba long u Kongsan ha ryngkat ka jingïadon lang jong u Samla Badonkupar Nongbri u ba long u Incharge jong ka KSU South Khasi Hills District Unit, Samla Edmund Khongsya General Secretary, Samla Richest Malngiang Vice President, Samla Denis Bnai Lamin Finance Secretary bad kiwei pat ki nongialam jong KSU South Khasi Hills District Unit.
U Samla Donald Thabah haba ai jingkren ha kane ka sngi, u lah pynpaw ka jingsngew bynñiaw ba wat hadien ba ka jylla ka lah dap pura 50 snem ha ka jingioh jylla ba pura ka jongka hynrei ki trai ri trai muluk ki dang bun ki ba sem shilliang kup shilliang, ka jing shah ban ha ka jingduk, ka jingbym biang ki lad kamai kajih bad ka jinghiar ha ka ïoh ka kot . Katba ka Sorkar Jylla naduh kaba mynshuwa haduh ka ba mynta ka kloi ban pynbiang ia ki Shnongwir ki Shongthap, ki poi ei ki poi hap bad phai da ka khmat kaba matlah bad leh meinah ki trai jylla.
Shuh shuh u lah pynpaw ba ka Seng kam lah ban shu peit tang ki khmat ïa la ki paradoh para snam ki ba shah lynshop ha kum kine ki jingshem, ka seng ba wat hapdeng ka jingtlot ki tyrpeng jong ki dkhot jongka, ka la lah ban tynrong lem ia kane ka jingkhia ki para doh para snam da ki kam nong samaria ba bha ki jongka.
Ka seng kam lah ruh ban pynpaw ïaka jingsngewnguh ïa ki ba lah noh synñiang ha ka jingtei ka jongka ïa kane ka ïing lyngba ka bormet bad ka jingsynñiang ka jongki lyngba ki tiar.
