Shillong, Jylliew 13 : Ka Coordination Committee of Registered MeECL (Employees) Associations and Unions (CCORMAU) ka la dawa na ka sorkar jylla ba kadei ban weng noh ïa ka jingkhang thungkam ha MeECL.
Na ka liang u President ka kynhun, Bah P Shullet, u la ïathuh ha ka jingkynduh bad u Symbud Myntri Rangbah ka jylla, Bah Prestone Tynsong, u la ong ba na ka liang u Symbud Myntri Rangbah u la kular ba ka sorkar jylla ka la don ha ka jingpynkhreh ban weng noh ïa katei ka jingkhang thungkam.
“Ngi dap da ka jingkmen ban ïathuh ba u Myntri u la ïaid shakhmat ïa ka kam, na ka bynta ban wengnoh ïa ka jingkhang,” u la bynrap biang.
Nalorkata, u President ka Ccormau u la pyntip ruh ba ka kynhun ka la phah tuklar ruh na ka bynta ban pynrung kam pura noh ïa kito ki nongtrei contractual jong ka MeECL.
Katkum ka jingïathuh jong u, ki la don haduh kumba 1700 ngut ki nongtrei contract kiba kynthup kumba 30 – 40 persen jong ka jingdon ki nongtrei ka MeECL bad kiba la dep ban shakri ïa ka tnad la kumba 20 snem ei ei.
“Kine baroh ki ïoh ïa ka jingsiew kaba long 10,000 haduh 15,000 tyngka shibnai. Kane kam ïahap shuh. Halor kane, u Myntri u la kular,” bynrap biang u Bah Shullet.
