Pynlong ka JTES da ka jingiatai nia halor ka phang ban pyndap ïa ki thliew dewïong da ki ñiut

Khliehriat jylliew 13: Ka Jaiñtia Tourism Environment Society mynta ka sngi ka la pynlong da ka prokram jingïatai nia (debate) halor ka phang ban pyndap ïa ki thliew dewïong da ki ñiut, ha kane ka prokram la wan ban ïa shim bynta da ki khynnah skul na ki san tylli ki skul na East Jaiñtia bad la pynlong ïa kane ka prokram ha Jaiñtia Eastern College Khliehriat.
Hadien ba la dep ka jingiatai nia hapdeng ki ar tylli ki kynhun kiba pyrshah bad kiba kyrshan ïa katei ka phang, u Deputy CEM jong ka JHADC u bah Lasky Rymbai, haba kren kum u kongsan u la pynpaw ba u kyrshan ïa katei ka phang ‘ban pyndap pat ïa ki thliew dewiong da ki ñiut bad ong ba kane ka dei kawei na ki lad ban pynkhuid ïa ka mariang, haba kren halor ka phang pdeng jong ka jingrakhe sngi pynneh mariang ‘don tang kawei ka pyrthei’ u bah Lasky Rymbai u la ong ba ka long kaba donkam ban ri bad sumar khuid ïa ka mariang.
“Ka sorkar pdeng ka la pyntreikam shibun tylli ki skim kiba iadei bad ka jingpynneh pynsah ïa ka mariang” u la bynrap bad ong ruh ba na ka liang ka JHADC ruh myn ha u snem 2021 ka la pynbna ïa ka IELO kaba dei ka prokram halor ka phang ban pynneh pynsah ïa ka mariang kumjuh ruh la thaw ïa ki Town Committee halor ka jingthmu ba lum bad pynkhuid ïa ki ñiut kiba mih na ki ïew ki hat bad na ki iïng ki sem bad ban ïada ïa ka mariang.
Ha ka jingiatai nia kaba hapdeng ki ar kynhun, na ka liang kaba kyrshan ïa ka jingbret ñiut ha ki thliew dewïong ka la pynpaw ba kane ka long kaba dei namar lada bret ha ki thliew dewïong ki ñiut kin nym saphriang bad kin nym satah bad ong ruh ba dei ban da tap bha bad ka dei ruh ka lad ban wanrah ïa ka jingkhuid ka mariang, la ong ruh ba kane kan ïarap ban pyndap pat ïa ki thliew dewiong kiba la dep pyndonkam.
Katba na ka liang ka ba pyrshah ïa katei ka phang, ki nongshim bynta ki la pynpaw ba kam long kaba bha ban shu thep ïa ki ñiut ha ki thliew dewïong namar kane ka buh jingma ïa ka lyer ba ring mynsiem, ïa ka um bad kan sa mih ka jingma iwtung, kaba buh jingma eh ka long khamtam lada bret ïa ki ñiut kiba mih na ki hospital kane kan buh jingma ïa ka koit ka khiah, kumjuh ruh la pynpaw ka liang pyrshah ba ka long kaba eh than ban leit bret ñiut sha ki thliew dewïong ha ki por slap ne por lyiur “haba poi ka por lyiur hato lait kali mo ban leit bret ïa kita ki ñiut sha thliew dewiong kiba don sha khlaw? ha ka por tlang te don ka lynti hynrei haba pyrkhat ha ka por lyiur te ym don surok ban leit sha ki jaka ba don thliew dewïong”
Ha kane ka jingïatai nia, uba jop bad ioh rung ha ka kyrdan ba nyngkong u dei u samla Kheinburom Syngkon, uba la mih khmat na ka Jaiñtia Eastern Secondary School Khliehriat, uba wan ba ar u dei u samla Pynsai Lyngdoh, na ka skul Tia Chaphrang Secondary School Sohkymphor, uba rung ha ka kyrdan ba lai u dei u samla Jonathan Siangshai, na Wapungskur Secondary School, kine baroh lai ngut ki dei kiba kyrshan ïa katei ka phang ba ka long kaba bha ban theh ñiut ha ki thliew dewïong, katba ka kynhun jong ka Jaintia Eastern Collehe Khliehriat pat ïa ioh ïa ka nam kum ka Best Team ha kane ka jingiakop ïatai nia.
Ïa ka prokram la pynïaid da u bah M.S.Lhuid, uba dei u Deputy Commissioner ba rim jong ka East Jaiñtia Hills District, kiba la ïa don ryngkat ha kane ka prokram ki kynthup u Principal Jaiñtia Eastern College Khliehriat, u Dr P.Nongtdu, u President jong ka JTES, u bah P.Lyngdoh, u bah J.M.Pohsngap, u bah R.Lamare, u bah S.K.Lato, kiba dei ki dkhot jong ka JTES.
La sam ïa ki prize bad ki momento sha kitei kiba jop ha ka jingiatai nia.