Leit jurip u Myntri ïa ka District Library Cum Auditorium Hall, lap bym shngaiñ shuh ban pyndonkam

Jowai, Jylliew 13: U myntri jong ka sorkar jylla u bah Sanbor Shullai ba dei peit ïa ka tnad Art and Culture bad kiwei de mynta ka sngi ula wan hiar sha nongbah Jowai, ban leit jurip da la ki jong ki khmat halor ka jinglong jingman jong ka District Library Cum Auditorium Hall kaba don ha Mynthong Jowai.
Ha kane ka jingleit jurip jong u Myntri ka long hadien ba ka Jaiñtia Student Union (JSU) Central Body kala dep ban aiti ïa ka dorkhas dang ha kine ki khyndiat sngi ha ophis treikam jong u ha Shillong halor jingsniew shaba palat jong katei ka Auditorium naduh ka rong ka rup, ki jaka shong jong ki paidbah, ka jingorpait jong ki kynroh, ki sat, ka jingbym biang ki painkhana, ka bording bad kiwei kiwei de.
Ha kane ka sngi la synran lang ïa u myntri naduh ki nongïalam jong ka Synjuk ki Waheh Shnong, Jowai kiba kynthup ïa u President ma Alan Niangti, General Secretary ma Requoma Rq Laloo, u Waheh shnong ka Mynthong, ha ryngkat ki nongïalam ka JSU maduh u President samla Jersom Shylla, Secretary samla Treiborlang Suchen lem bad ki dkhot.
U myntri ha ka jingjurip ïa katei ka Auditorium ula lap shisha ïa ka jinglong jingman jong katei ka Halls kaba la duna shaba palat, hynrei ïa kane ka Auditorium la sdang ban maramot ïa ka dang katto katne sngi bad na ka liang myntri ula ïathuh ba kam long shuh kaba biang tang ban maramot hynrei la donkam ban shan noh da kaba thymmai ka Building kaba don haduh 6 mala bad ban pynduh pyndap ïa kane ka Building ba rim namar ka jingshong synjor.
La pynkymmaw ba ïa kane ka Auditorium la tei ïa ka naduh ka snem 1987 hynrei haduh mynta ym shem la don kano kono ka jingmaramot, U Myntri ula kular ban shim khia ïa kane ka kam da kaba wanrah noh ïa ka DPR na ka bynta ban phah noh sha ka sorkar kmie khnang ba kan ïoh leh ïa kaba donkam.