Mawkyrwat, Jylliew 13: U MDC jong ka Rambrai Jyrngam, bah Bajop Pyngrope mynta ka sngi u la ïoh ban plie pyrda ïa ka lympung ïalehkai kynjatbol kaba la tip kum ka 1st Knockout Football Tournament 2022 kaba la pynïaid da ka Kyntiew La-I-Sap, Pynden-Umjaraiñ, South West Khasi Hills District.
Ha kane ka sngi plie pyrda la pynïalehkai nyngkong eh ïa ka Kur Myrthong Football Team pyrshah ïa ka Kur Thongni Sanmat Football Team ha kaba ka Kur Myrthong FT ka la jop noh da 5 – 4 kol lyngba ka Tie Breaker.
Ha ka jingïalehkai jong ka kyllastep bad kyllamiet wat hapdeng jong ka jingpynthut jong ka mariang lyngba ka jingwan tap u lyoh hynrei ka la long pat ka jingïalehkai ka long kaba itynnad bad kaba ïa khaid bha namar ka Kur Marthong FT ka la ïoh bam thep ïa ka kol kaba nyngkong lyngba penalty ha ka 15 ba la kynjat u Shngaiñ Marthong kaba dei ha ka jingïalehkai jong ka kyllastep katba ka Kurthongni Sanmat FT pat ka la lah bam pynphai ïa kane ka shikol ha ka minit kaba 68 da u Kuparwel Thongni kaba dei ha ka jingïalehkai jong ka kyllamiet.
U bah Bajop Pyngrope haba kren kum u kongsan u la pynpaw ka jingaikhublei kaba kyrpang na ka bynta ka Kyntiew La-I-Sap kaba la pynlong ïa kum kane ka lympung ïalehkai kaba long kum shibynta ban wanrah ka jingïajan bad ïa ithuh ithaw para ba mar jan shnong, namar ha ki kam ïalehkai kin ïa kynduh beit ïa kiba kham khlaiñ bad kiba tlot bor hynrei haba khlaiñ ne tlot kim dei pat ban ïa kheiñsting ba ha ka jingïalehkai kan don beit kaba jop bad kaba shah rem.
Kumta u la ai ka jingkyrkhu kyrdoh na ka baroh 8 tylli ki kynhun kiba la wan ban ïashimbynta ha kane ka lympung bad kumjuh ruh ïa ki ar tylli ki kynhun kiba la ïoh ba sdang bad pynïalehkai mynta ka sngi ba kin ïalehkai bha bad ïaleh da ka mynsiem jingïalehkai khnang ba kan long ka jingmyntoi na ka bynta jong ki hi. Hooid! ha ka jingïalehkai kan don beit ka jingïadom hapoh madan hynrei wat ai pat ba kata kan long ka daw ha ka jingim jong ki kaba manla ka sngi.
Lada ki kynhun ki kwah ban pynkiew ïa la ki jong ki samla ha ki kam ïalehkai, kum ki nongpynïaid lada long kaba lah kiar na kaba thied ne wanrah na shabar”, ong u Bajop.
Namarkata, u la ai mynsiem na ka bynta ki nongpynïaid ïa kane ka lympung ïalehkai ba kin nang ïai ïa pynlong ïa kum kine ki jaid jingïalehkai khnang ba kan long ka jingïarap na ka bynta ki para samla jong ka don ka thaiñ ba kin nang kiew ha ki kam ïalehkai.
Ha kane ka sngi la ïoh ruh ka jingkren pdiang na u Sordar Shnong Pynden-Umjaraiñ, bah Stalinroy Thongni ha kaba ïa ka jingïalang la pynïaid da u samla Thrangbor Wanniang bad ka jingaikhublei na u Baïaineh Thongni.
Kiba ïadonlang lang ha kane ka sngi ki long u bah Kitborlang Nongrem, President ka National People Party Youth Front (NPPYF) jong ka Jylla Meghalaya lem bad kiwei kiwei ki ‘riew rangbah, ki samla bad kumjuh ruh ki nongwanpeitkai.
