Jowai, Jylliew 13: Ka jingïalehkai phutbol ba 3 sngi lynter bala pynlong da ka Seng Samla Shnongpdeng Cultural & Sports Club (SC&SC), ha madan Shnongpdeng naduh ka 9 tarik, la pynhap pyrda noh ha kane ka sngi Saitjaiñ 11 tarik da MLA ka thaiñ u ma Lahkmen Rymbui uba dei ruh u myntri sorkar ka jylla ba peit ïa ka tnad pule puthi.
La ïathuh ba ka kynhun Lamin XI kaba la ïoh rah ïa ka nam jop bad ïoh rong syndon ïa ka song pisa kaba 60 hajar tyngka ryngkat bad ka trophy, katba ka kynhun ba wan ba ar ka ‘Club always be ready’ kala ïoh rong ïa ka pisa kaba 40 hajar tyngka ryngkat bad ka trophy.
Haba phai sha ka jingïalehkai phainal kala long kaba shong shit bha ha kaba ka kynhun Lamin XI kala jop da 1-0 kol ïa ka ‘Club always be ready’ bad kane ka jingïakhun hapdeng kitei ki ar kynhun kala pynhun shisha ïa ki paidbad kiba wan sakhi sha kane ka phainal ryngkat kiwei de ki shnong kiba marjan.
Ha kane ka sngi pynkut la wan ban ïadonlang ryngkat u ma Bnai Syngkrem, Rangbah shnong Shnongpdeng uba long kum u symbud kongsan lem bad ki riew Rangbah naka thaiñ War Jaiñtia.
