Shillong Rymphang 11: U CEM ka KHADC Bah Pyniaid Sing Syiem hynne ka sngi Ba-ar ula pynthikna ban buh ïa ki Coaching Centre, Rehabilitation Centre, ban kyntiew ïa ka jingseng kam lajong, ki kam ïalehkai bad ban kyntiew ïa ka koit ka khiah, lada u shah jied kum u MDC jongka Nongthymmai constituency.
Ula pynpaw ia ka jingskhem jingmut ba un jop ïa ka elekshon MDC jong ka KHADC ka ban long ha ka 21 tarik u Rymphang, u Bah Pyniaid Syiem ula ong, “Lada nga shah jied kum u MDC, nga buh ïa ka Coaching Centre ha Nongthymmai constituency, kaban long kaba ïa ryngkat bad ki Centre ha Delhi. Kane ka centre kan ai jinghikai ei ïa ki samla jong ka constituency ba kin pynkhreh ïalade na ka bynta ki eksamin ki bapher bapher. Ngin leh ïa kane namar ba ngi lah ïohi ba bun ki briew khamtam kito kiba wan na ki longïing baduk kim lah kot bor ban leh shabar ban ïoh ïa ka jinghikai pyntbit”.
“Ngin pynshlur ruh ban sengkam lajong hapdeng jong ki samla khnang ba kan ym long tang ka jingïohkam ka jongki hynrei kin long ruh kum kita kiba aikam kylla ïa kiwei ruh.Nalor katei ngi kwah ban kyntiew ïa ki kam ïalehkai na ka bynta ki samla. ïa kane ka rai la shim hadien ka jingïasyllok bad ki khynnah samla khamtam bad kito ki ban dang thep vote ha ka sien kaba nyngkong eh” la ong u Bah Pyniaid bad ka bynrap “Ngam don jingartatien ba da kaba pynshong nongrim ïa ki mat treikam ki jong ngi, ki paidbah kin jied ïa ngi ha ka elekshon ban wan”.
Nalor kane u Bah Pyniaid ula kular ruh ban shimkhia bad ka sorkar jylla ïa ka jingdonkam ban kyntiew shuh shuh ïa ki jaka ai jingsumar ïa ki paidbah bad halor ka jingkyrduh um hapoh jong ka constituency.
“Nalor ka jingwanrah ruh ïa ki ain ki bapher halor ki mat bapher bapher, ngi don ruh ïa ka jingkitkhlieh ban wanrah ïa ka roi ka par hapoh ka constituency. Lada nga ïoh ïa ka lad, ngan shimkhia halor kiba bun ki mat kiba mad da ka constituency bad ka sorkar jylla” ula ong bad ka bynrap “Ki don ki shnong hapoh ka constituency, kaba ki nongshong shnong ki hap ban shu thied ïa ka umbam umdih bad ki don ruh ki briew ki bym kot bor ban leit phah sumar haba ki pang ki shitom, kumta ngi donkam ban kyntiew ïa ki jaka ai jingsumar”.
“Ngi kwah ruh ban buh ïa ka Counselling bad ki Rehabilitation Centre na ka bynta kito ki bym kot bor ban ïoh ïa ka jingsumar na ka jingkyrni ha ka jingdih drok.Ngi kwah ban pynthikna ba ki dei ban leit sah ha ki Rehabilitation Centre. Nalor kane ngi kwah ruh ban buh ïa ka Skill Development Institute ban ai jinghikai ïa ki samla ha ki kam khaii pateng bapher bapher khnang ba kan long ka lad ïohkam ïohjam” ula bynrap.
