Duh result matrik 9 ngut ki khynnah pule ka Patharkhmah Government HSS ba kynnoh leh bakla u nonghikai

Nongpoh, Jylliew 13: Kumba 9 ngut ki khynnah pule jong ka Patharkhmah Government Higher Secondary School, Patharkhmah kim shym la mih kyrteng haka result SSLC ba dang shu pynbna shen ka MBOSE kaba la buh ïakitei ki khynnah bad ki kmie ki kpa hapdeng ka umdum, bad pynlong ruh ïaki ban ujor shaka seng Khasi Student Union, bad kumjuh ki nongïalam shnong.
Naka liang ka seng KSU hapoh ka jingïalam u samla Receive Pator President ka KSU Western, Ri Bhoi haka jingdonlang u Bah Najim Kharmalki Sordar ka Shnong Patharkhmah, mynta ka sngi kila leit ban wad jingshai naki bor pynïaid jong katei ka skul halor ka jingbym mih kyrteng kitei ki 9 ngut ki samla pule kiba shim ruh ïaka subject tourism, bala kynnoh ruh ba ka dei ka jingleh bakla jong u nonghikai ba shim ïa katei ka subject, hynrei naka liang ka seng bad ki nongïalam shnong kim shym la ioh kynduh ïaki bor pynïaid hynrei la shu kynduh tang ïa uwei u nonghikai ha katei ka skul.
Haba ïakren bad u Bah Receive Pator u la ong ba katkum ka jubab ba ki nongïalam seng bad kumjuh ruh ki nongïalam shnong kila ioh kalong baka daw ka jingbym ioh result kitei ki khynnah ka dei naka daw ka internal marks ha kaba u nonghikai jong katei ka subject bala tip kyrteng kum u Ksankupar Shongwan u la shu ai marks khlem da bishar ïaka internal marks kaba dei 20 ka Full Marks bad 6 ka Pass Marks, bad kaba sngew lyngngoh ka long ba utei u nonghikai u la ai marks ïa kitei ki khynnah palat ïaka full marks kaba la pynlong ïaka MBOSE ban ym lah ban pynmih ïaka results jong kitei ki khynnah.
Halor katei ka jingleh torti utei u nonghikai bad ki bor pynïaid skul naka liang ka seng kala kyntu ba ki bor pynïaid skul ki dei ban shim ka jingkitkhlieh ban pynioh result ïa kitei ki 9 ngut ki samla pule hapoh kine ki sngi namar lada slem ka long pat ka jingeh ïakitei ki samla ioh rung klas, bad naka liang ka seng kala phah ruh ka kyrwoh sha ki bor pynïaid skul ba ki dei ban shim ka jingkitkhlieh wat ban pynrung klas ïaki khynnah sha ki College ba ki kwah ban leit.
Shuh shuh ka seng da ka jingbitar halor katei ka jingduh result matrik kitei ki 9 ngut ki khynnah pule naka liang ka seng kala maham ruh ïa utei u nonghikai ba um dei ban wan hikai shuh ha katei ka skul namar kane ka dei ka jingleh torti bad ka jingjia ba nyngkong ha katei ka skul pule ba ki khynnah kin duh result matrik, u la bynrap.