Shillong, Rymphang, 09: U Myntri Rangbah ka Jylla Manipur, u Nongthombam Biren Singh u la aiti shithi iehnoh kam ha u Lat ka Jylla Manipur u Ajay Kumar Bhalla, ha Raj Bhawan, Imphal, ha ka sngi U Blei ha ka por kumba 5:20 baje janmiet, hadien ba ka Congress ka la wanrah ïa ka jingbym shaniah shuh (No Confidence Motion) bad ka jingtynjuh bor, ong ki lad khubor.
Ka jinghiar shuki jong u Biren Singh ka wan jia hadien ar snem ba ka Jylla Manipur ka la mad ïa ka jingïaumsnam kaba shyrkhei kaba la khie ha ka 3 tarik, Jymmang, 2023 hapdeng ki jaidbynriew Meitei kiba buhai shnong ha rithor Imphal bad ki jaidbynriew riewlum Kuki-Zo kiba sah sha jaka rilum.
Katkum ka jingkheiñ ba la ai da ka Sorkar Manipur, haduh ka 3 tarik, Jymmang 2024, ki haduh 221 ngut ki briew kiba la duhei ïa la ka jong ka jingim ha ka jingïaumsnam bad 60,000 hajar ngut ki briew ki la kylla phetwir, palat 1,000 ngut ki la mynsaw bad 32 ngut ki briew ki la jah rngai.
Haduh 4,786 hajar tylli ki ïing ki la shah wiang ding bad kylla dpei bad 386 tylli ki jaka mane blei ki la shah pynjulor, kynthup ïa ki Ïingmane bad ki temple.
Kane ka jingïaumsnam ka la khie hadien ba ki jaidbynriew Meitei kiba la dawa ban ithuh noh ïa ki kum ki riewlum. Ka All Tribal Students’ Union Manipur (ATSUM) kaba pyrshah ïa kane ka jingdawa ka la pynlong ïa ka jingïaid paidbah kaba jaijai ha ka 3 tarik, Jymmang, 2023 hynrei hapdeng ka jingïaid paidbah ka la mih pynban ka jingïashoh hapdeng ka kynhun jong ki jaidbynriew Kuki bad ki jaidbynriew Meitei hajan khappud ka Churachandpur District bad ka Bishnupur District, kaba la bteng pat sa ka jingshah wiangding ki ing ki sem. Ka jingïaumsnam ka la pur stet kum ka ding ha u langïap sha sor Churachandpur kaba buhai shnong da ki Kuli bad sha them Imphal kaba buhai shnong da ki Meitei. Katkum ka khubor, 7 ngut ki Kuki bad 10 ngut ki Meitei ki la shah pynïap tang hapoh shitaiew.
Shwa ban hiar shuki, u Biren Singh u la ïakynduh ïa u Myntri ka tnat Kam Pohing ka Sorkar Pdeng u Amit Shah ha Delhi.
Ha ka shithi hiar shuki, u Biren Singh u la pynpaw, “nga u Nongthombam Biren Singh, Myntri Rangbah ka Jylla Manipur, nga aiti ïa ka shithi iehnohkam. Ka la long ka burom ban shakri ïa ki paidbah ka Manipur haduh mynta. Nga sngewnguh shikatdei eh ïa ka Sorkar Pdeng na ka bynta ki jingtreikam biang por, ki jingïarap, ki kam pynroi bad ki jingpyntreikam ïa kiba bun ki projek na ka bynta ban ka roi ka par ki nongshong shnong ka jylla Manipur. Nga kyrpad ïa ka Sorkar Pdeng lyngba ka shlem treikam jong phi ban dang ïaibteng ïa kine ki kam. Nga shim ruh ïa kane ka kabu ban pynpaw ïa ki mat ba kongsan na ki:
i). Ban pynneh pynsah ïa ka jinglong trai ri jong ka Manipur kaba don ïa ka histori kaba riewspah ha ka imlang sahlang palat hajar snem.
ii). Ban tehlakam ïa ka jingwan rung tuh ha khappud bad ban thaw ïa ka polisi na ka bynta ban beh krad ïa ki poiwir kiba wan rung be-aiñ.
iii). Ban bteng ïa ka jingïakhun pyrshah ïa u drok bad ïa ki kam pyntriem kiba mih na ka jingkhaii drok.
iv) Ban bteng ïa ka rukom treikam kaba pyrkhing bad ka Fool-Proof Revised Mechanism jong ka FMR da kaba pyndonkam pyrkhing ïa ka Biometric.
v) Ka jingpyndep biang por bad ka jingpynstet ïa ka jingïada u pud u sam kaba dang ïaid shakhmat.
“Sngewbha, pdiang ïa ka jingiehnohkam jong nga bad khublei.”
Ka thymmei khubor ka ïathuh ba u Singh u la ai jingmut ruh ban pynjari noh da ka jingpynsangeh shipor ïa ka Ïingdorbar Thawaiñ, watla ki jingtip kiba bniah halor kane kim pat paw shai haduh mynta.
Shwa ban hiar shuki, u Biren Singh u la leit sha Delhi hynnin ka sngi Saitjaiñ, la pynthikna ka khubor. Hynrei haduh mynta ym pat lah satia ban ïoh ïa ka jingtip kaba bniah ïa kane ka jingleit jong u Singh sha Delhi.
Kum ban shu pyntip hangne ba dang ha ka 5 tarik mynta u bnai shwa ba u Biren Singh un leit sha Delhi ban ïakynduh ïa ki nongïalam bahakhmat ka BJP, lai ngut ki Myntri Sorkar bad saw ngut ki MLA ka BJP ki la leit sha Delhi da ka liengsuiñ barit ha ka janmiet sngi Balang, la ïathuh ka khubor.
Kine ki lai ngut ki Myntri Sorkar ki long u Myntri ka tnat PWD u Govindas Konthouam, u Myntri uba khmih ïa ka tnat Forest and Dnvironment u Thongam Biswajit, u Myntri uba khmih ïa ka tnat Consumer Affairs u L. Susindro Meitei.
