Shillong Rymphang 03: U MLA ka United Democratic Party (UDP) na Sohïong Bah Synsharlang Kupar Lyngdoh ha ka sngi Nyngkong, u la thep kyrteng kum u kyrtong ka UDP ban aireng na Sohïong-Nongspung ha ka elekshon MDC haba ban jur ïa ka jingdonkam ba dei ban shna noh ïa ka map bad u pud u sam ba thikna jong ki Hima bapher bapher.
Ha kaba ïadei bad kane haba kren sha ki nongthoh khubor, u Bah Synshar ula ong ba ka rai jong u ban ïakhun hi ïa ka elekshon ka dei namar ka jingkwah bad ka mon jong ki paidbah ka Constituency.
Une u MLA ula kyntait jur ba ka don ka jingïasngewthuh bakla hapoh ka ïing ka sem hadien ka rai jong u Khun u Kni (L) Bah HDR Lyngdoh, u Nathaniel Rymmai ba un ïakhun ïa ka elekshon na ka ticket ka congress.
Ha kaba ïadei bad kane u la ong, “Kam don satia kano kano ka jingbym ïasngewthuh jingmut hapoh ka ïing. Ka dei ka ri synshar paidbah bad mano mano ruh ki lah ban ïakhun ïa ka elekshon. Kino kino kiba kwah ban ïakhun ai ba kin ïakhun,” u la bynrap.
Na ka liang jong u Bah Synshar ula ban jur ïa ka jingdonkam ban pynkhlaiñ ïa ki aiñ ba la don lypa hapoh KHADC bad u la ong, “Na ka kyrteng jong ka constituency hi, ngi tip ba ki don artylli ki Hima-ka Sohïong bad Nongspung. Ki don ruh ki shnat jong kine ki Hima-ka Nongwah Mawtamur kaba don ha khappud ka Assam bad kaba donkam ban pynthikna ba ka jingsuk kan don ha katei ka jaka”.
Une u MLA ula ban jur ruh ïa ka jingdonkam ki synshar khadar ha ki shnong ki thaw da kaba ong, “Nga kwah ruh ba ki Hima kin don noh ïa u pud u sam bad ka map kaba thikna”.
Haba kylli, u Bah Synshar ula ong, “Ngi la pynkhreh bha ban ïakhun ïa kane ka elekshon kum ka party bad ngin pyrshang kat kaba lah ban jop”.
“Ngim lah ban thied ïa ki paidbah da ka pisa bad dei namar kata ngi la leit sha ki paidbah da ka jingieid bad nga kyrpad ïa ki paidbah ba kin kyrshan ïa nga kum u kyrtong khnang ba ngan jop ïa ka elekshon ADC,” ula ong.
