Shillong, Rymphang 03: Ka Kong Amanda Pakyntein, ka kurim u MLA na Mawkynrew bad Myntri barim ka Sorkar Bah Banteidor Lyngdoh ba la ju khot ieid Bah Paidang, ha ka sngi Nyngkong, ka la pyndep ïa ka jingthep kyrteng kum ka kyrtong ka National Peoples’ Party (NPP) ban ïakhun ïa ka elekshon ADC na Mawkynrew, ka ban long la 21 tarik Rymphang.
Ha kaba ïadei bad kane haba ïakren bad ki nongthoh khubor, ka Kong Pakyntein ka la ong, “Nga sngew skhem ban jop ïa kane ka elekshon bad nga kular ba ngan bud ïa ki dienjat jong u kurim ha ka ban wanrah ïa ka roi ka par sha ka constituency bad ban trei shitom ha ka ban pynkhlaiñ ïa ka Sixth Schedule jong ka Riti Synshar ka Ri, kaba dei ka bor ïada kaba khlaiñ duh ïa ki riewlum trai ri trai muluk nalor ban ïada ïa ka riti ka dustur ba riewspah ka jaitbynriew”.
Haba ban jur ïa ka jingdonkam ban pynkhlaiñ ïa ka durtur ai jait Kmie, ka la ong ba ka long kaba donkam ruh ban wanrah ïa ka synshar khadar kaba khuid ha KHADC. “Ngi donkam ban pynthikna ïa ka jingthungkam thungjam kaba shai bad ruh ka jingïada ïa ka mariang,” ka la bynrap.
Ka la kam ruh ba u kurim jong u, ula leh shibun kiei kiei na ka bynta ka constituency da kaba wanrah ïa ki kam pynroi bapher bapher na ka bynta ka jingmyntoi bad ka bha ka miat ki paidbah.
Haba kylli, ka kong Amanda ka la ong, “Nga phah ïa ka jingkitbok kitrwiang ïa u MDC ba mynta. Nga la dei ban jop ïa ka elekshon 2019 hynrei baroh ngi tip ba ngi la rem namar ka jingïatreilang hapdeng u MDC ba mynta bad u Bah Remington Pyngrope. Hynrei, ha kane ka kynti nga sngewskhem bha ba ngin jop ïa kane ka elekshon”.
U Bah Banteidor ula pynpaw ïa ka jingsngewskhem ba ka kurim in jop ïa kane ka elekshon da ka jingieid bad jingkyrshan ki paidbah jong ka constituency ha kaba ïadei bad kane ka kam.
